I-Cosafa dololo…

09 Jun, 2022 - 00:06 0 Views
I-Cosafa dololo… Cosafa Cup

uMthunywa

YiNtatheli kaMthunywa
IQEMBU lamaWarriors selikhitshwe komunye umqhudelwano wamazwe ngenxa yokuvinjelwa yinhlanganiso yeFifa.

AmaWarriors, asanda kuxotshwa ku-Afcon ka-2023, ngeke athole ithuba lokudlala kunkezo yeCosafa Cup lonyaka ngemva kokuba abaqoqi bomqhudelwano bethethe inyathelo lokuthi bawakhiphe kuluhlu lwamaqembu azadlala.

Lokhu kubezindaba ezimbi kubadlali labathandi bomdlalo wenguqu kuleli ngoba kutsho ukuba lonyaka kuzakubanzima ukubukela iqembu lesizwe. Inkezo yeCosafa ayikho kukhalenda yeFifa.

AmaWarriors ebelodumo lokunqoba inkezo yeCosafa ngakho ukungadlali kwawo lonyaka kuzehlisa izinga lomncintiswano.

Imidlalo izaqhutshwa kusukela mhlaka 5 kusiya ku 17 Ntulikazi. Lonyaka kunxuswe ilizwe le-Senegal.

Amanye amazwe azaphatheka yiMalawi, Angola, Comoros, Lesotho, Eswatini, Botswana, Mauritius, Seychelles, South Africa, Zambia, Madagascar le-Namibia.

Kumbiko wayo ngomqhudelwano lo, inhlanganiso ye-Cosafa ichaze ukuba iZimbabwe ikhitshiwe ngesizatho sokuba ayivunyelwa ukudlala yiFifa.
“IZimbabwe yiyo yodwa ekhitshiweyo ngenxa yokumiswa kwayo yiFifa,” kutsho umbiko weCosafa.

“Umbuthano wokuqhathwa kwamaqembu uzakwenziwa enkundleni yeMoses Mabhida Stadium, edolobheni leDurban, ngoLwesibili, mhlaka 14 Nhlangula.

AmaWarriors

“Umqhudelwano lo, okhona kusukela mhlaka 5-17 Ntulikazi, uzaphinde uhlanganise leSenegal njengelizwe elinxusiweyo.”

Inkezo yeCosafa yasungulwa ngo1997.

Kulumncintiswano, iqembu leZimbabwe laziwa ngokukhipha ithalenta elitshisayo futhi yilo eliphumelelayo njengoba selinqobe inkezo eziyisithupha.

Lonyaka ababukeli bavunyelwe loba kuqonqoselwe ukuthi kuzangena enkundleni isilinganiso esiyingxenye yekhulu. Kusenjalo, ukujeziswa kweZimbabwe yinhlanganiso yeFifa akwaziwa ukuthi kuzesulwa nini.

Kubikwa kulemizamo yokuthi kukhulunyiswane.

Inhlanganiso yeFifa iqina ngokuthi iSports and Recreation Commission yekele ukuxokozela kumdlalo wenguqu, lokuthi iqula lenkokheli zeZimbabwe Football Association zibuyiselwe ezikhundleni zazo.

Share This:

Sponsored Links