uMthunywa
Joel Ndlovu
ABALIMI sebekhuthazwe ukuba balwise umkhuhlane we-clubroot ngoba ulakho ukutshabalalisa insimu yonke yekhabitshi okungabangela ukuthi inzuzo yomlimi yehle.
Ekhuluma lentatheli kaMthunywa uMnumzana Mike Rugowo oyingcitshi kwezokufuya lokulima esabelweni seMatabeland North uthe umkhuhlane we-clubroot uyingozi kakhulu ngoba uyabulala ikhabitshi.
“Umkhuhlane lo ubangelwa yizinanakazana ezihlala emhlabathini futhi kunzima ukuzilwisa. Ngenxa yesizatho lesi umlimi engakalimi ikhabitshi yakhe kumele abone ukuthi umhlabathi wakhe kawuhlaselwanga yimikhuhlane.
“Ikhabitshi ingahleselwa yilo umkhuhlane kayikhuli kuhle, njalo ibamfitshane. Umbala wamahlamvu ekhabitshi uyatshintsha ubelithanga, impande ziswabe,” kuchaza uMnu Rugowo.
Uqhubekele phambili esithi ukutshintshanisa izilimo kuyabulala izinanakazana lezi.
“Umlimi kumele atshintshanise izilimo zakhe ukwenzela ukuthi abulale izinanakazana lezi. Ukuphendula umhlabathi loba kungela okuhlanyeliweyo kuqakathekile ngoba kuyabulala izibungu ezingaphansi kwenhlabathi, lanxa zingafanga zonke kuyaziphungula ukwenzela ukuthi nxa umlimi esefafaza imithi enelise ukuziqeda zonke.”
“Enye indlela yokubulala izinanakazana lezi yikufaka iphepha elimnyama phezu kwenhlabathi emini ilanga libalele ukwenzela ukuthi inhlabathi itshise ibe isibulala lezo zinanakazana, ukutshisa lokhu kwenhlabathi kuyabulala njalo umkhuhlane we-clubroot,” kutsho uMnu Rugowo.
Uphethe ngokuthi abalimi nxa besilwa lezinanakazana kumele batshintshanise imithi abayisebenzisayo.
“Izinanakazana ezibulala isilimo njalo ezibangela imkhuhlane ezilinyweni ziyajayela umuthi zicine zingasafi ngakho ke kuqakathekile ukuthi umlimi atshintshanise imithi yakhe ngokuyakwesikhathi ukuze kubelula ukulwa lalezo zinanakazana,” kuphetha uMnu Rugowo.
