Thokozile Mbedzi
KUBE yinjabulo enkulu kubafundi beQueens Primary School, eNyathi ngemva kokuba betholiswe izifundo eziphathelane lokukhula kanye lama-pads ngeviki ephelileyo.
Ekhuluma esesikolo seQueens uNkosikazi Adelaide Nyathi weBubi Hospice uthe ama-pads aqakathekile ngoba abantwana nxa bekhula bahlangana lokuguquka kwemizimba yabo.
“Bafundi ekukhuleni kwenu imizimba iyaguquka, amankazana imizimba iyaguquka baphuhle babe sebengena esikhathini kukanti abafana labo balenguquko abahlangana lazo labo okugoqela phakathi kokunye ukutshintsha kwelizwi.
“Ama-pads la sibone kufanele ukuba sizowanika amankazana la ngoba sibone ukuba asebenziseka lula njalo ayawatsheka aphinde njalo asetshenziswe.
“Kuma-pads la siphinde njalo safaka lebhulugwe langaphansi ngenhlonso yokuba babe kwazi ukusetshenzisa kwawo babe lokuhlaliseka ngesikhathi lesi nxa besesikhathini.
“Sibafundisa njalo ukuba bagqoke njani ngoba labo kumele badlale kuhle bekhululekile labanye ngakho indlela anamathiselwa ngayo inhle njalo kawatsheki kumbe ukuphuma endaweni.
“Ukutshintsha sikuqakathekisa kakhulu ukuze balandele iziqondiso ezempilakahle ngendlela eqondileyo,” kulandisa uNkkz Nyathi.
UMphathisikolo uMnumzana Christopher Mangena uthe ulokujabula okukhulu.
“Ngilokujabula kakhulu ngilapha ngesipho esisilethelwe ngabeBubi Hospice ngakho siyabonga okukhulu silapha ngokuba basixhase ngama-pads la.
“Ama-pads la ngijabulele ukuba ayenzwe ngendlela elobunono obuphezulu njalo bahle banika abafundi konke lebhulugwe lakhona lokuba bagqoke kukonke nxa besemalangeni abo.
“Ngithande ukuthi athungwe kuhle afakwa lokokunamathisela okwenza abafundi bakhululeke.
“Lokhu kwenza labo benelise ukuhlala kuhle njengabanye ngoba abantwana baba lokuhlulukelwa nxa bengagqokanga kuhle okwenza bengasatholi ithuba lokuba badlale njengabanye loba ukuphatheka emisebenzini etshiyeneyo.
“Ngiyabonga isipho lesi lathi besile-club ethunga ama-pads kodwa indlela la athungwe ngayo siyibone inhle njalo sizakhulumisana labakhulu bami ngoba lelembu lakhona lilohlonzi ukwenzela ukuthi lathi sihlomise abafundi bethu bakhule labo sebelolwazi baphathise umphakathi abazabe bekuwo,” kuphetha uMnu Mangena.
