uMthunywa
Nkosilathi Sibanda
LONYAKA sizajabula, sigide singaqedi ngengoma ezivela kuqembu lomculo we-Afro Tech, i-Asante Mo.
Iqembu lakoBulawayo leli livule umnyaka omutsha ngokukhipha ingoma ethi Going Away esivuthisa inkundla emsakazweni lasemakhasini obulembu.
Kuthethe amalanga amalutshwane nje ukuthi ingoma le ithandwe linengi koBulawayo laphetsheya.
Ekuphekeni lingoma, i-Asante Mo isebenze labaculi abasacathula koNtuthu uTizzie loNolizwe.
Intatheli yephephandaba likazulu iphiwe ithuba lokuthi ilalele ingoma entsha le ngoMvulo emini, lapho ethole ukuthi buyaphambili ubungcitshi be-Asante Mo.
Umdumo wengoma ungena kakuhle ku-Afro Tech, umculo osusabalale emazweni amanengi. Umculo lo ujabulisa abasakhulayo labadala, nanko uvuma abathanda ukugida lalabo abafuna ukuthi balalele behlezi phansi.
Asante Mo
Ngokuhwatsha lingoma, amalunga eqembu, uBekithemba “Beckx Marabha” Phiri, uNewman “Daiman” Trinidad loAaron “DJ Beast” Chikondawanga sebefeze amaphupho abo.
UPhiri, ekhuluma lentatheli uthe kunengi okuzayo lonyaka.
“Sizalisukumisa lonyaka. Sithanda ukubika ukuba sesikhiphe ingoma entsha esiyibize ngokuthi Going Away,” kutsho uPhiri.
“Le yingoma esivula ngayo umnyaka sihlose ukuthi singenise abantu kugiya lobunandi umnyaka usasemutsha. Sisebenze loTizzie loNolizwe kulingoma. Sikhangelele ukuthi sipheke njalo ezinye ingoma sisebenza labanye abaculi.”
Asante Mo
Uthe inhloso yabo ngokuhlanganela labanye abaculi yikuthi bafuna ukutshumayela ivangeli lokubambana lokuncedisana.
“Umsebenzi lo ngowethu sonke singabaculi. Nxa sisenza kanje, sitshengisa ukubambana. Kuhle ukuthi siphakamisane, senze umsebenzi wethu ubemkhulu, sifinyelele umhlaba wonke.”
Iqembu le-Asante Mo selithola usekelo laphetsheya. Ekupheleni kukaLwezi ngo-2022, lanxuswa kumkhosi we-Jika International Theatre Dance Festival (JITDF) eSouth Africa.
“Sibatsha kodwa sesinxuswa kunkundla eziphezulu. Yilo iphupho esasilalo siqala umsebenzi wethu lo,” kwatsho uDaiman ekhuluma lentatheli kaMthunywa mhlaka 22 Lwezi ngesikhathi belungiselela uhambo.
Emkhosini lo, i-Asante Mo yethula umsebenzi walo omutsha obizwa ngokuthi iHosana.
