uMthunywa
Nkosilathi Sibanda
NGESIKHATHI kubunjwa iqembu le-Asante Mo ngomnyaka odluleyo, amalunga alo ayehlose ukuthi asabalalise umdumo wabo we-Afro Tech kunkundla eziphezulu.
Lelo phupho selifezekile, nanko phela uBekithemba “Beckx Marabha” Phiri, uNewman “Daiman” Trinidad loAaron “DJ Beast” Chikondawanga sebenxuswe kumkhosi we-Jika International Theatre Dance Festival (JITDF) eSouth Africa.
Amadoda womathathu la adabuka koBulawayo, azabukisa umhlobo wezomculo wabo owahlukileyo ohlanganisa ngobuciko imigido, ingungu zesiNtu lengoma zakulezinsuku.
UBeckx Marabha loDaiman zingcitshi ekutshayeni ingungu kuthi uDJ Beast nguye ozibambe etafuleni yezomdumo. Bobathathu laba sebetshiye inengi lincoma umsebenzi wabo, okuyikhona okwabakhela udumo kumadolobho amakhulu kuleli.
Iqembu leli lijabule limanzi te ngokubizwa kumcimbi omkhulu.
“Sibatsha kodwa sesinxuswa kunkundla eziphezulu. Yilo iphupho esasilalo siqala umsebenzi wethu lo,” kutsho uDaiman ekhuluma lentatheli kaMthunywa ngoLwesibili emini.
“Mhlaka 1 lo 2 Mpalakazi sizabe sijabulisa abantu eBloemfontein Civic Centre lapho kumkhosi we Jika International Theatre Dance Festival. Siyazigqaja ngokuthi sikhethwe ukuba simele ilizwe lakithi emkhosini lo obuthanisa abantu abanengi abavela emazweni atshiyeneyo.”
Uthe kumkhosi we-Jika International Theatre Dance Festival bazakwethula umsebenzi wabo omutsha obizwa ngokuthi iHosana.
UMarabha ubike ukuba bazasebenzisa inkundla le ukuthi bathole ulwazi lokwakha ubudlelwano obuzavula amathuba okuthi bayebonisa ithalenta labo phetsheya.
“Isiqokoqela yikuthi sifike sifunde, siphenduke ekhaya silolwazi. Umsebenzi wethu siwuphatha njengebhizimusi ngakho kumele sandise ulwazi kulokhu.
“Indawo enjenge-Jika International Theatre Dance Festival izasivulela amathuna, senelise ukuthi sibizwe phetsheya. Siyakubongela lokhu.”
IJika International Theatre Dance Festival yalonyaka izaqhutshwa amalanga amane.
