uMthunywa
Nkosilathi Sibanda
IZIKOLO sekumele zifundise abantwana umhlobo womdlalo we-basketball obizwa ngokuthi yi-“3 on 3” ngokutsho kukamongameli weBasketball Union of Zimbabwe (Buz), uJoe Mujuru.
Umhlobo lo we-basketball usanda kuvunyelwa ukuthi uncintiselwe enkundleni ezinkulu kuma-Olympics, okuyikho osekufuqe iBuz ukuthi ikhuthaze izikolo.
Ekhuluma lentatheli yephephandaba likazulu ngoLwesithathu, uMujuru uthe loba ilizwe leZimbabwe lingakaqini okuzwayo kulumdlalo, bona bazimisele ukuthi bafundise abasakhulayo ukuze kube lula ukubumba iqembu labadlali abazancintisa emazweni kwelakusasa.
UMujuru utsho kanje ngemva kokunanzelela ukuthi bayasilela abadlali be-basketball ezikolo ezinengi, ikakhulu labo abazi i-3 on 3.
Kuminyaka emibili edluleyo, iBuz yathumela iqembu labadlali kweleBotswana kumidlalo ebizwa ngokuthi yiYoung Lions Cup Championships. IZimbabwe isincintise okwesibili kulumqhudelwano.
“Njengoba zivulwa izikolo, silombono wokuthi izikolo kumele zifundise abantwana i-3 on 3, okungumhlobo we-basketbal omutsha,” kutsho uMujuru.
UMujuru uthe uhlobo lwe-3 on 3 ku-basketball loba lungakabi lodumo kuleli, bakhangelele ukuthi balukhankase lusabalale.
Joe Mujuru
“Ezikolo lapha sikhangelele ikusasa. Ngaphandle kokuthi sifundise abantwana, angeke ukhule umdlalo.”
Umongameli lo uthe lonyaka bazaqhuba imincintiswano eminengi njalo bakhangelele ukuthi ilizwe lenze kuhle kumincintiswano ebalisa eyama-Zone 6 edlalelwa ngaphansi kwenhlanganiso yeFederation of International Basketball Associations.
Ngo-2019, iZimbabwe yanxusa amazwe asezansi yezwekazi le-Africa lapho okwanqoba khona iqembu le-Angola iPremiera Augosto.
Ukuqhutshwa kwemidlalo le kweza ngesikhathi inhlanganiso yeBulawayo Basketball Association ikhalaza ngokuswela imali yokusekela imidlalo yayo.
Ekuqaleni komnyaka odluleyo inkokheli zalumdlalo koBulawayo zabika ukuba zizahlanganisa iligi yazo lamanye amadolobho aseduzane ukuze kubelula ukusondeza amankampani angakhwabitha ukusekela.
