uMthunywa
Ethel Ncube
ZISELE zikhakhamele izakhamizi zeDolo, eMberengwa ngemva kokuba kukhitshwe undofa oqhiyileyo embhedeni kasobhuku obesekudala ukuba angasahlangani lonkosikazi wakhe endlini yokulala.
Isiga lesi senzakale emavikini amabili adluleyo lapho okukhitshwe undofa olamangqongqo entanyeni eqhiyile ekhanda embhedeni kasobhuku uDula Moyo.
UMthunywa uzwe ukuba undofa obesembhedeni lo ubesebangele ukuthi usobhuku lomkakhe bangasahlangani emacansini.
Intatheli ixhumane lomunye umfakazi owayekhona kukhitshwa undofa lo oveze ukuba imuli yakoMoyo isisenkingeni enkulu yokubhadala umphurofethi lo.
“Usobhuku waphiwa umbheda ngumkamnewabo esebhubhile esithi yindlela yokumbonga kanti semnike ijogwe, uzapika egqoke ezakhe. Undofa lo ubesesenza usobhuku lomkakhe baxabane okwacina kubangela ukuthi amxotshe ayelala emkulwini esithi yena kasamfuni kanti lokhu bekusenziwa ngundofa lo obesembhedeni.
“Okwenza undofa lo wavela egcekeni kwenziwa umlindelo kwalalwa kuhlatshelwa ubusuku bonke undofa waze wakhutshwa ekuseni wonke umuntu ekhangele sambona ngamehlo angani ngumuntu ongumama ikhanda leli liqhiyiwe egqize waphelela entanyeni,” kulandisa umfakazi lo ongathandanga ukuqanjwa ngebizo.
“Osokuhlupha khathesi yikuthi ngubani ozabhadala umphurofethi sekujikelwana inyoka ephilayo ngoba usobhuku uthi umbheda wawuphiwa, kutsho owamnikayo wamupha esazi ayekufakile,” kubika umfakazi lo.
Ekhuluma lentatheli omunye oziveze ngokuthi nguMaMthembo uchaze ukuba kuliqiniso ukuba kwaphuma undofa oqhiyileyo embhedeni kasobhuku uMoyo.
“Undofa wakhutshwa wonke umuntu ekhangele sibili umphurofethi waveza futhi ukuthi bekusenza usobhuku axabane lonkosikazi wakhe nanko phela umama ubeselala emkulwini yedwa.
“Usobhuku wathi umbheda wawuphiwa ngunkosikazi kamnewabo, asazi khonapho ekumpheni ukuthi kwangena njani utikolotshi. Umphurofethi uphinde waveza ukuthi undofa lo kayisuye kasobhuku kodwa-ke wamphiwa lelolanga ephiwa umbheda.
“Osokuluhlupho yikuthi lalowo owanika usobhuku umbheda uyaphika ukuthi undofa ngowakhe. Le yindaba esihlupha kumdeni wakoMoyo sebekhombana ngeminwe, asazi ukuthi kuzaphetha ngani,” kuchaza uMaMthembo.
Iphephandaba likazulu lixhumane lelinye ilunga lemuli yakoMoyo elingathandanga ukuqanjwa ngebizo lisesaba abadala eliveze ukuba kuliqiniso ukuba undofa wakhutshwa.
“Sisalinde uMoyo ukuba alethe udaba lwakhe emulini sixoxisane sibone ukuthi kungenziwani. Okokuthi undofa ukhitshwe eqhiyile kosobhuku liqiniso sibili njalo umbheda wawuphiwa ngumkamnewabo ebonga ukongiwa komkakhe kodwa umbuzo esilawo yikuthi baphanana njani amanye amalunga engatshelwangwa. Udaba okwakhathesi alukakhulunywa, sisalinde ukuba babuye sikhulumisane,” kuchaza ilunga lakoMoyo leli.
Imizamo yokuxhumana loDula Moyo usobhuku lapho okwaphuma khona undofa yehlule ngoba kuthiwa kala makhalekhukhwini.
