uMthunywa
Ekuzalweni komntwana kujabula abazali bomntwana kanye labosendo, batshaye umpululu ziphume izipho kukhungwa usane.
Lezinsuku ngenxa yokubhaha kwemikhuhlane ethelelwana emacansini engelaphekiyo njalo efaka impilo yomntwana lonina engozini, abezempilakahle bakhuthaza ukuthi umuntu engacabanga ukuba lengane ahlolwe igazi esibhedlela ukuze athole izeluleko eziqondileyo.
Kuvamile emadodeni amanengi abafuni ukuyahlolwa igazi kodwa ukuzala bekufuna. Phela inengi liyabe lidliwa yisazela, ngoba izenzo zabo zobunondindwa bezazi.
Awufukamele umkhuhlane umuntu, athulise cwaka okofudu ocatshe ewatheni ezwe iqhude lensingizi likhala.
Ngenxa yokuthi omama ngomdabuko kumele balalele obaba angazabe esenqaba lengubo noma engelaqiniso lesimo somkakhe noma kukhona okunye ayabe ekusola, kwesinye isikhathi lempawu zegcikwane ziyabe sezikhanya kodwa atshaye embe phansi umuntu oyindoda ngoba ethi umuzi ngowakhe kukhala esakhe isicathulo akatshelwa muntu into yokwenza.
Abanye obaba ngabathi bangasola ukuthi mhlawumbe bangabe sebelalo igcikwane sokutshone omunye abake bazwana laye, ngenxa yokungafuni lokwesaba ukuyahlolwa azale ngapha langapha ethi nxa elomkhuhlane kuzaqala ngokubanjwa ebantwaneni, engazi ukuthi wenza isono. Khuluma isimo ukuze kwenziwe imizamo yokuthi usuzale umntwana ongelalo igcikwane ngoba sekulamaphilisi okuthundubeza leligcikwane.
Hamba uyehlolwa igazi ungabi lolunya lwendlondlo elophaphe ekhanda eluma inkomo ezintathu zife ingasoze izidle inyama. Ayixabene.
Umlobi uthinteka
ku: 0714355641
