Gerald Sibanda
IQEMBU elidlala kuligi yeZifa Southern Region Division One i-Adachi FC lilomgadli olesiphiwo uNathaniel Moyo obolekwe kuqembu leChicken Inn, njalo lithemba ukuthi umdlali lo, uzaguqula iqembu.
UMoyo, oleminyaka yokuzalwa engu-23, ungomunye wabagadli abesatshwayo kuligi njengoba elethalenta elingabuzwayo, elihlanganisa lejubane elenza abadlali abasemuva baphazamiseke enkundleni.
Ungene ku-Adachi ekuqaleni kwalisizini, ngemva kokubolekwa kwelinye iqembu eliku-Zifa Southern Region Division One iRatanang FC lapho ahlohla khona amabhola amane emidlalweni emihlanu nyakenye.
Uzajabula ngokuthi e-Adachi ubelesikhathi esinengi sokudlala esingamsiza athuthuke futhi angahle azibone ebuyela ebholeni kukundla eziphezulu.
Useyidlale yonke imidlalo wahlohla amabhola ayisikhombisa, abalisa amathathu benqoba nge 3-2 bedlala leMosi Rovers, iqembu leFolosi enkundleni yeWhite City Stadium.
“Ngibona angathi lo kwaba ngumdlalo wami ongcono kakhulu wesizini le kuze kube khathesi. Ngenelise ukuhlohlwa amabhola amathathu futhi kuliphupho labadlali bonke abangabagadli ukwenza lokho, yingakho kube yisikhathi engingasoze ngasikhohlwa,” kutsho uMoyo. Uphinde wancoma umqeqeshi wakhe uPhilani “Beefy” Ncube waveza ukuthi ukumethemba kwakhe kudlala indima enkulu.
“Ungumqeqetshi ozithobileyo njalo wonke umuntu uyazi ngaye. Udlale ngempumelelo emaqenjini aphezulu futhi ukungethemba kwakhe yikho okunginikeza idlabuzane,” kutsho uMoyo.
Uthe ungene kuqembu lakuqala leChicken Inn ngomnyaka ka2019. Ubike ukuba kwelakusasa uzahlosa ukuthi adlale ngokuzikhandla ukuze ahuge amehlo abacuphi labaqeqetshi bamaqembu aphetsheya.
Isifiso sakhe esikhulu yikuthi adlalele iqembu lesizwe amaWarriors.
Inengi labathandi lababukeli bomdlalo wenguqu ka-Division One abakhangelelanga ukuthi iqembu le-Adachi libe ngelinye lamaqembu ajaha ukukhuphukela kuPremiership. Inhloso kaMoyo yokuthi iqembu lakhe liqede isizini lihleli kunombolo ephezulu.
