uMthunywa
Blessing Moyo
INHLANGANISO ebona ngezokulima ngaphansi kogatsha lukaHulumende lwezoMhlabathi, eZokulima, Amanzi lezoMkhathi, eye-Agritex ikhuthaza abalimi elizweni ukuthi bangavilaphi ukuhlakulela izilimo zabo ukuze zenze kuhle.
Agritex
Ekhuluma loMthunywa uNkosazana Gota Taruda ongumlimisi esigabeni seMangwe uthe kuqakathekile ukuthi umlimi ahlakulele izilimo zakhe ukuze zikhule kuhle njalo zithole ukudla emhlabathini.
“Abalimi kumele bahlakulele izilimo zabo ukuze zikhule kuhle ngoba akulunganga ukuthi ukhula lulingane lesilimo, lokhu kucina kuphazamisa ukukhula kwezilimo zicine zingenzi kuhle loba zisitsha.”
“Ukhula luyaphambanisa izilimo ekutholeni amanzi emhlabathini kungakho kuqakathekile ukuba umlimi ahlale ehlakulela isilimo sakhe.
“Kuyasiza futhi ukuphendula umhlabathi ngoba nxa usuthelela kumbe izulu selisina liyenelisa ukuthi amanzi angene phansi,” kuchaza uNkszn Taruda.
Uqhubeke echaza ukuthi ukuhlakula kuyanceda ukuthi ukudla okusemhlabathini okuphezulu ungahlakula kuyangena phansi kuphathise ekukhuleni kwezilimo.
“Ungahlakula ukudla okusemhlabathini okuphezulu kuyaphendulwa kungene phansi kuphathise ekukhuleni kuhle kwezilimo. Okunye njalo ukuhlakula kuyasiza ukuthi kungene umoya ezilinyweni.
Uphethe ngokuthi abalimi bengavilaphi ukuhlakulela izilimo zabo ukuze bathole isivuno esiphezulu.
“Kulezibungwana ezithanda ukuhlala lapho okulokhula khona ezingahlasela izilimo ngakho umlimi engavikela imikhuhlane le ngokuhlala ehlakulela isilimo sakhe. Kuqakathekile ukuba umlimi ahlale ehlakulela izilimo ukuze athole isivuno esiphezulu,” kuphetha uTaruda.
