Halala uBulawayo ulamathalenta!

04 Jul, 2019 - 00:07 0 Views
Halala uBulawayo ulamathalenta! UQ Dube

uMthunywa

Vusumuzi Ndlovu
NGEMPELAVIKI imisebenzi yamathalenta okujabulisa umphakathi ibonakele njalo abanye bathole izicoco lemiklomelo kumcimbi wamaRoil Bulawayo Arts Awards 2019.

Umcimbi wangoMgqibelo uhlokomise uwonke lo wonkana ophatheka kwezokuthokozisa uzulu ekoBulawayo kanye lezethekeli ebezimenyiwe ezivele kwezinye indawo ebezizobuka imisebenzi emihle yakoNtuthu.

Banengi abakhethwayo, kodwa bambalwa abanqobileyo. UNqobile Dube, odume ngegama elithi Q Dube loba u QTha Boss, uthethe isicoco sikaOutstanding Comedian, ngemisebenzi yakhe yokulingisa esebenza eseMzansi Afrika. U-Q Dube ekhuluma loMthunywa uswele amagama okubonga ngoba uthi sonke isikhathi ekhula lapho acina esekuZbctv lePowerFM ubengakhohlwa lapho aphuma khona, njalo uhlezi uBulawayo esenhliziyweni yakhe.

Kube kuhle ukubona uNate Oktopus ethola isicoco sakhe sokuba nguOutstanding Producer.

UNate Oktopus usebenze kakhulu labaculi abanengi ababalisela uLeslie, uMr Kay, Jeys Marabini, uCal_Vin labanye esizakhuluma ngabo kulumbhalo. Uke wasungula idlalade leGospel Hymns ngo2016, elalihlanganisa ingoma zokholo le jazz. Idlalade leli kukhangelelwe ukuthi liphume kunyanga ezimbalwa ezizayo.

Kujabulisile njalo ukubona uNovuyo SeaGirl esuka ethwele izicoco ezimbili eseOutstanding Female kanye leSong of the Year (uAEIOU) ngengoma ayicula loLance Hebron. Lokhu kutshengisa ukuba loba eke wadlula phakathi kokuhlukuluzwa emicimbini edluleyo, kadelanga ukuqhubeka esebenza nzima njalo ubambelele emsebenzini wakhe ekhangele impumela yawo, sithi Amhlophe!

U-Asaph uthethe isicoco sikaOutstanding Hip-Hop iminyaka emibili ilandelana. Lokhu kutshengisa ukuthi idlalade lakhe uThe People’s Rapper eliphume enyangeni ezidluleyo liyamukelwa kuhle.

U-Asaph ubencintisana lengqwele ezifana loMUSE osungule idlalade uP.O.L.L.A.H, uMsizKay osungule uBayashiselwa, UGuluVa7 ngoCommand Hustle, lo KBrizzy odume ngedlalade lakhe uCashmere SummerEP.

UCal_Vin laye ubekhona kuleliqembu labakhethiweyo, njalo unqobe isicoco seOutstanding Male Artiste, loba engasanqobanga kuSong Of the Year ngengoma yakhe u “Banjalo Abantu”.

Usungule idlalade lakhe u“Intwana kaManax” elihlanganisa ihip-hop le kwaito. Sisakukwaito, uSkaiva laye unqobe kuOutstanding Kwaito/House/Gqom iminyaka ilandelana.

UDJ Eugy weRed Café wanqoba kuOutstanding Club DJ.

Umlobi utshayela ihlombe bonke ababekhethiwe kuRoil#BAA2019, ukunqoba kwabanye yikukhula kwethu sonke. Siyabonga ngosekelo oseludlulise umnyaka sikhankasela umculo lemisebenzi yethu yasekhaya.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds