NDAKAPUNGAYILA muhango ndikahaya tjandinobhata
Ndakagwisa woku nawokuya,
Moyo ukalamba ukati imi ndoziba Nhomwe
Sangwenu Nhomwe afupatila ndowuntini moyo iwoyu?
Awutobvuma ndikumbule kumwe
Kana ndakabe ndawila ndapelela kunaNhomwe
Ndiko gwadza kweludo!
Utjalila moyo wangu
Ndikwala ndijali ndowumbila
Kuti pamwe limwe hhuba unganyalala
Ndikakangan’wa nekwaNhomwe
Wakandida ekandihema
Ludo gotongojalo kene?
Kene kwagala kwakusiludo?
Mundibhatshe whola dzangu
Mundilayile nti unolapa moyo
Munditshile nti wandingan’wa apodza moyo
Nekuti magwadzo andinowha ambeli
Tjidzani ka kuku bangu
Londipanda londa leludo
Batetugulu mungandilayila n’anga kene?
Inowodusa Nhomwe mumoyo wangu?
Gwakandihinga ludo!
Gwakandisenga ndikanga nhu umumakole
Gukandimilidzila pehhugwi
Gukandilakidza kose kwakanaka
Gube gundiphapha pasi gundiphadanganya
Ndikanga nhu wahangana n’holo
Ludo kene?
Ndakakon’wa fema
Ndikalila mihodzi isingapele
Ndikakumbula kose kwakwakanaka
Ndikawha kundibabila munlomo
N’holo ukandipanda
Ndikawonda mbili
Gwandihinga ludo!
Butjilo gwangu ndakayemula gufidza
Kuti magwadzo andinowha apele
Ndikakumbula banondida bakandizwala
Ibo bangasala betjila tjini kene?
Pamwe limwe hhuba ndowonaya
Saku ndili ngwele weludo
Ye ludo wandigwadza zwingapa kwatini?
Bamwe nonga usingabagwadze tjini?
Gwandihinga ludo!
Nhetembo yakwagwa naSelusweyinkosi Mhlanga.
Kalanga Language and Cultural Development Association
+263 772610726.
