uMthunywa
Tina Success Mlalazi
KWABE mahhuba manjinji tjoselele Ntjidzi enda muzila in’ompela yadza ikayibva ungati ndeye n’ombe ape dzinda kudamu. Kene eyinda mahhuba ose ayitowu nyadza kana unobe akahanha, moyo ulintjena ntjena senkaka wemholombe, munkumbulo akalinga mhandala yakaNleya yakatola moyo uwe wose ikawusiya eligambgwa.
Mandala iyeyi wakasiya itjintjetjana enda kuGoli enohaka n’hingo makenyidla, koga wakabe agala ayisa hhiho. Ndizo lonyaka wati ejita egala atanga bhuzwa kuti Letjani uyapo? Wabengapani? Wakada poni? Nemahha wakabe etji mwanana wakapelela kakale etjiyapo munzi, kwele esingatjande ngobe esakabhudilila mugole lebuna lezwidiyo zwapehhugwi.
Nanasi Ntjidzi umuzila iye wakalinga kumatombo kunohakila boLetjani whuni. Lubaka unoguziba kwazo kana unogala awha netjidzwe dziseka mandala ape dzonda kumatombo. Enoswikako banana behaka ndzi dze sunga whuni, beti bewumbona bamwe besiya Letjani yega beti batjavuna dzamangwana kulizila yepa hhaba babili lubaka gwelebeleka dzabo.
“Mabuyani.”
NdiLetjani evuna tjibvi ebuyisa Ntjidzi.
“Yebo MaNdazi, unjani?”
“Ndotjila.”
“Kwakanaka. Imi anditotjila wale undibona ipapa konda mbili wonga moyo ukukuli wose. Kuti ndilipi dama leludo landinotjuluka linota ukasandipa moyo uwo? Iko lebelekela moyo kolema, pamwe kuyi wawudusiwa ndandowudusa ukazwilebelekela nezila wawunokuda nayo kana ungawana nlomo wangu kuli iwo usingaduse matama akalizana ludo gumumoyo wangu. Ndokuda kusingalizanisike MaNdazi ndokumbila bgwilila kuJwanzibeli ndoziba kuti uwangu!”
Enga unowoliga n’hodzi mbisana waMoyo alimile mbeli kwaLetjani akawubhata luboko, eguzanisa, nsikana atji tshinatila pasi ekwala kwala zwinhu zwisingaboneke negumbo pasi. Moyo ulofemela pehhugwi ungati unhu wayelabuka. Koti abvume kana unowunda bo iwoyu mbisana koga ape eti enohhula nlomo atshwe mate kuwome hhulo kulambe bhuda matama. Elebe matama ose eludo aanoziba mbisana eti unowana n’handulo koga nsikana enyalale koga ewuwha kuti akutji iye, woyefemela pehhugwi etetema. Ewunletje luboko eti pamwe wumbhata ndiko kunota ekatetema ekahla nehandula.
Kube nekunyalala lubaka nyana tjose, belebeleka mumimoyo yabo tjino zibgwa nayibo boga. Badze babhude mumikumbulo yabo bewha bamwe baswika, belobe nhambo in’opela bebgwilila hule bepalalana kuli iko bebona kuti babatjisodzelelana kwazosa tjose kuti babewhana fema.
“Ngono nolamba lebeleka nami nasi imi ndoyenda antoziba kene mangwana ndoswika ngeno ngobe ndohaka noswika kabasekulu ndinobabona saku ndotjobgwilila wale”.
Ejalo ufupatila moyo wogwadza kwazo kana wakalingilila kuti ediwe kana kwabe mahhuba eposa matama kakale nemahhuba awe abemahomanana, utjobgwilila kunhingo.
“Mazwibhatigwa Ntjidzi ndandikumbila usibgwilile usandiwoneka”.
Kube matama aanodusa Letjani tjinga kwaapeleledza ebuyisa Ntjidzi eswika, ehanduke etjebuka mapapu epulana nehhana. Apa elinga ewana Letjani atjitihha epedza leba lelo dama ungati unozwisola kuti wayelebelani. N’holo wembisana uhangane esingazibe kuti mwanana woyu unokumbulani nekukwe.Ndekwaanotini ikoko mahhuba ebgwilila aswika? Asitjamuke enobona kuku babe? Ekaletja nobabona mwanana ehhe enyalalazwe sa nasi ke? Ludo gogwadza.
