uMthunywa
Nkosilathi Sibanda
UBATSHILE umoya abeqembu leHighlanders owayengumqeqetshi uHendrik Pieter de Jongh ngokuya kuFC Platinum, nangu njalo usezokhweza ubuhlungu ngokuphenduka enkundleni yeBarbourfields ngoMgqibelo.
Umqeqetshi engabe etshengise ukuba inhloso yakhe isekuphakamiseni izinga lakhe njengomqeqetshi ngokuyancintisa enkundleni zaphezulu kumqhudelwano we-Confederation of African Football Champions League.
IFC Platinum idlala le-Al Ahly yaseGipite ngoMgqibelo enkundleni yeBarbourfields.
Lumqeqetshi ubeyifuna eyokuyadlala kumiqhudelwano yeCaf njalo ubelitholile ithuba kuHighlanders ngokunqoba inkezo yeChibuku Super ngesizini edluleyo.
Ukwehluleka kweqembu leHighlanders ukuthi liyencintisa kumqhudelwano wenkezo ye-Confederations Cup kumdanisile lumqeqetshi loba ubeseqedile ikhontileka lakhe.
UMthunywa uthintane lomqeqetshi lo ngesikhathi elolongela umdlali weFC Platinum le-Al Ahly.
Umqeqetshi lo uthe uzibona esenza okunengi, enqoba lenkezo ezinengi kuzimbamgodi.
“Ngingumqeqetshi olesikhathi eside ekunguqu njalo sengisebenze lamaqembu amanengi. Ukuyadlala kunkezo ye-Caf ngikukhangelele. Ngiseqenjini elitsha, asimeni kancane sibone ukuthi siyangaphi.
“Akula phela umqeqetshi ongafuniyo ukuyancitisa enkundleni zaphezulu. Mina ngakwenza lokhu leqembu le-AFC Leopards eKenya lakuqembu lesizwe se-Rwanda,” kutsho lumqeqetshi.
Kusenjalo, iPure Platinum Play ibalekelwe ngabadlali abayisithupha abakhethe ukuthi bayedinga amadlelo angcono. Ukusuka kwabadlali laba kuvule ithuba kubadlali abafunwa ngumqeqetshi omutsha lo.
Isikhulumi saleli qembu uChido Chizondo uthe kubadlali abatshiye kwakhiwe kuPlatinum kuloDevon Chafa, Mkhokheli Dube, Wallace Magalane, Albert Eonde, Charles Sibanda loRodwell Chinyengetere.
Abasiki bebunda abaseZvishavane bathe kungenzeka ukuthi kusiyaphela iviki iqembu lezimbamgodi leli libe selibize uRalph Kawondera owayekuqembu leTriangle, uNomore Chinyerere ophume eHwange labadlali ababili uStanley Ngala loLast Jesi ababetshibilika kuManica Diamonds.
