uMthunywa
Indikimba – Ezomanyano, Imbongi nguSibangilizwe P Jubane
Isihloko senkondlo – Mkhulu lowo mbiko
Nxa sifunda linkondlo sisuka ekuqaleni sibalombuzo.
Ngumbuzo bani lowo esilawo? Ngumbuzo ngothi ngumbiko bani lo okukhulunywa ngawo njalo uchazwe ngokuthi umkhulu.
Kodwa nxa sijula siyicubungula linkondlo kujinge kuvele ukuthi lo umbiko omkhulu kangaka ngowokubambanisa abantu beZimbabwe ukuze bahlale ngokuthula hatshi ngokuthobelana bona besizwe sinye.
Njengoba indikimba icacile zonke imbongi ezifakwe ngaphansi kwayo zikhuluma ngokubambana kwamabutho kumbe ngithi ukubambana kwamabandla amabili wona ayiwo athatha izikhali alwisana labamhlophe ababezindezele abantu abaNsundu kuleli elakithi.
UJubane yena kawathanga bhadla ngamabizo lawo mabandla njengabanye labo abalenkondlo zabo esizifunde ngaphambili.
Ngokuzwa kwethu kwezinye inkondlo ngaphansi kwendikimba yinye esesizifunde ngaphambili amabandla la abikwa ukuthi abambana kwabikwa umkhosi omkhulu yiPF-Zapu leZanu zabumba ibandla elilodwa i-Zanu-PF.
Ukubambanisa la amabandla yikho okwabikwa ilizwe lonke yikho imbongi ithi , “Mkhulu lowo mbiko.”
Wabamkhulu lowo mbiko ngoba kwakungasonto elula ukuhlanganisa lawo mabandla. Ukudonselana kwawo kwakulethe ingxabano lokungathembani kunye lokufuthelana ebantwini.
Sesiqala manje ukuyilandela linkondlo sisukela ekuqaleni sizwe ukuthi ithini imbongi ngalowo mbiko ethi mkhulu. Imbongi iqala inkondlo yayo ngokusitshela ngokuthi kuzwakele kulo lonke ilizwe lakithi njalo kuzwiwe nguye wonke umuntu wakithi.
Iyaphambili imbongi ithi zonke ezakithi izinanakazana lezinyamazana zikuzwile lokho kumemezelwa kwalo umbiko omkhulu wokumanyana.
Zikuzwile zonke izihlahla lezihlahlakazana zakithi zikuzwile lokho kumenyezelwa.
Ikuveza sobala imbongi nxa iqhubeka ngenkondlo yayo isitshela ukuthi utshani, imifula, izintaba, izintatshana, lamaqaqa akithi awuzwile lowo mbiko wokumanyana.
Lokhu kuveza sobala ukuthi umkhulu lowo mbiko. Mkhulu lowo mbiko, imbongi ithi ngumbiko omkhulu ongelamkhosi.
Umbiko lo ubikwe ngamakhosi esizwe ekhonale esigodlweni selizwe.
Amakhosi esewubikile lowo mbiko omkhulu imbongi ethi awulamkhosi bahlokoma, bathuthumela bethithibele bonke abantu ngoba okukhulu kungelamkhosi.
Iyagcizelela imbongi ukuthi ubikiwe lowo mbiko omkhulu, ubikwa ngabakhulu behlezi esigodlweno esikhulu sakwelakithi.
Usubikiwe lowo mbiko esigodlweni wasabalala ngencingo wagcwala ilizwe lonke elakithi.
Wangena lakumaphephandaba kwaba yinto efananayo ugcwala usiyafinyelela lakundawo ezikude.
Wangena emoyeni lakho wasakazwa wahamba wafika lakundawo ezikhatshana.
Ngaleyo ndlela umbiko lo wachapha izinlwandle waze wayathinta imiduli yonke yomhlaba.
Zawuzwa zonke izizwe zomhlaba esikuwo.
Sizayiqala lapha njalo linkondlo ngeviki ezayo.
