Giya Mthwakazi Iqoqo lezinkondlo Ugwalo ludindwe yiLongman Zimbabwe

05 May, 2022 - 00:05 0 Views
Giya Mthwakazi Iqoqo lezinkondlo Ugwalo ludindwe yiLongman Zimbabwe

uMthunywa

Kesikhumbuzane mayelana lokuphendula imibuzo yenkondlo. Kuqakathekile ukuthi wazi uluhlu lwezinkondlo okumele zenziwe ngalo umnyaka. Nxa usuwenze kanjalo zama ukuthi ufake uluhlu lwezinkondlo lezo ngaphansi kwezindikimba ezitshiyeneyo.

Ungakhangela kugwalo “Giya Mthwakazi” inkondlo zifakwe ngaphansi kwendikimba ezimbalwa.

Nanzi indikimba eziqanjiweyo lapha: Ezothando, Ezihayayo, Ezisolayo, Ezezindawo, Ezokunakana, Ezilezikhalazo, Ezempi, Ezokufa, Ezomanyano, Ezenkolo, kanye leZemvelo. Lokhu kuyanceda kakhulu abafundi ngoba nxa sekufika emhlolisweni kulula ukuthi abafundi bakhethe inkondlo abazithandayo kusiya ngokukhetha kwabo.

Indlela elula yokusebenza yikudinga ukuthi yona oyithandayo yiyiphi. Ungayikhetha-ke usuyibala uyiphinde ukuze uyizwisise ngcono. Into yokuqala yikuzwisisa udaba lwayo inkondlo leyo ongabe uyikhethile. Kulula njalo ukuthi uyihlaziye ngezigaba zayo leyo nkondlo.

Qaphela ukuthi kungenzakala ukuthi uhlanganise imibono etshiyeneyo evela kuzigaba ezitshiyeneyo. Chasisa imicijo yakho ngokugcweleyo.

Chasisa imicijo ecatshileyo yembongi uyenze ibesegcekeni kulowo oyifundayo inkondlo. Ekufundeni leyo nkondlo kumele utsho ukuthi imayelana lani ngokugcweleyo. Kumele udinge injongo yembongi ekulobeni leyo nkondlo. Okulandelayo yikuyichasisa imbongi udaba lwayo ngokugcweleyo.

Lapha kuqakathekile ukuthi usekele imbono yakho ngokucupha izibonelo kunkondlo leyo. Ukusekela imicijo yakho ngokucupha izicaphuno ezithile kuqakathekile ngoba lokhu kufakaza ukuthi uyizwisisa okunganani inkondlo leyo.

Usuka ekuchasiseni udaba lwayo kulandela ukuhlolisisa indlela imbongi esebenzisa ngayo ulimi. Ulimi luyindlela ezinengi kodwa lunandisa lunothise inkondlo. Lapha kulimi sinanzelela izinto ezinjengokwenza samuntu, isifaniso/isifananiso, isingakethiso, ihaba, isiqathaniso, lokunye okunjengabo fuzamsindo emaphethelweni ezigaba zenkondlo. Imbongi ziyasebenzisa ingxenye zolimi ezitshiyeneyo sisenzela ukuthi inkondlo zazo zihlabuse endlebeni zalabo abazibalayo.

Imbongi nxa ziloba inkondlo zisebenzisa indlela eyehlukileyo kuleyo okulotshwa ngayo izingwalo zokubala. Inkondlo zilotshwe ngezigaba/iziqendu ukwehlukanisa imibono yazo etshiyeneyo. Uyakunanzelela mfundi ukuthi amabala amanengi kunkondlo ayaqunywa ukuze inkondlo zibaleke kumbe zibe lemisindo ethile.

Kumele abafundi bananzelele ukuthi imbongi ziyaloba inkondlo ezithile kodwa zilomqondo munye. Lokhu kuqakathekile ukuthi abafundi bakunanzelele ngoba balakho ukuthi nxa sebehlaziya lezi izinkondlo baxubanise bathi inkondlo ethile ithe kunje ngesihloko esithile kanti akunjalo kodwa kuseduze ngoba imbongi zilobe ngendlela iphosa ifanane.

Njengesibonelo ngaphansi kwendimba yezemvelo imbongi ezinengi zilobe ngezulu kodwa izihloko zitshiyene kodwa zikhuluma ngento efananayo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds