uMthunywa
Indikimba – Ezemvelo, Imbongi nguPathisa Nyathi
Isihloko senkondlo – Zulu zulu woza
Kundikimba yezemvelo sesifunde okunengi ngezulu lona eliletha ukuphila ebantwini.
Sibonile ukuthi umhlaba womile kodwa ngokufika kwalo izulu zonke izinto, izihlahla, utshani kunye lezilimo ezinjengabo mumbu bona abathi lanxa kade sebebuna, bedanile kodwa izulu lingana konke kuyahlakanipha. Kule inkondlo imbongi uNyathi uyalibiza izulu ukuthi kalize.
Nxa imi phandle imbongi ithi iyalibona ilanga libomvu entshonalanga ligonjolezelwe njalo libiyelwe ngowamakhosi ombalanala. Yini lokhu okubiyele ilanga ngemibalabala.
Lokhu ngibona angathi imbongi ibona lokhu esithi ngumchilo wamakhosikazi wona esiwubona ngesikhathi sezulu imibalabala.
Ikhangele kanjalo imbongi inyanga layo ngokufananayo yatshona. Izinyanga lazo zazila amagona (inyosi) zazila lamanzi.
Lendwangu layo zayibona itshona inyanga. Indwangu lezi yizo phela okuthiwa “Oziphongo bakoNcube bayibona. Oziphongo labo bayibona bethe zeth’ezihlothini zezindlu zabo.”
Lokhu kutsho ukuthi indwangu lezi ziyibona ziphezu kwamadwala emaqaqeni kumbe ezintabeni. Yikho phela lapho ezihlala okulezihlothi zezindlu zazo. Izihlothi ngamaphethelo ezindlu phezulu ephahleni. Indwangu ziyibona kuqala kulabantu inyanga nxa ithwasa.
Lokhu kwenziwa yikuthi zona zihlala engqongweni yezintaba. Indwangu seziyibonile inyanga ithwasa njengalamuhla bona abantu imbongi ithi bayihlangabeza ngokuyithokozelela imbongi ngamazwi athi:
“Kholiwe! Kholiwe! Hamba lomkhuhlane.” Abantu balenkolelo ukuthi inyanga ithwasa iyisima kanjani.
Isibonelo kuthiwa nxa ithwasa ucezu lwayo lukhangele phezulu kutsho ukuthi ngaleyo nyanga imikhuhlane iyabe ichaphakele abantu abanengi bazagula.
Nxa injalo inyanga kuyabe kuthiwa ithwele umkhuhlane kodwa nxa ucezu lukhangele phansi abantu bakholwa ukuthi imikhuhlahe izaba nganeno.
Iqiniso lalokho lawe usungazidingela. Imbongi ikholwa ukuthi umzila wamakhosi ombalanala yisiziba sezulu. Nxa ibona lokho imbongi ikholwa ukuthi lizakuna izulu.
Sebeyibonile inyanga labo ngelanga elilandelayo imbongi ithi bayibona bakhomba bayihlola babona yababonisa yabakhomba izulu.
Iyaphambili imbongi isitshela ukuthi yatshisa vutha inhlansikazi yaphezulu yazipheka phansi izihlahla phansi emhlabathini. Izihlahla nanzo lazo zaqalisa ukununkula, zihlanza amahlamvu.
Sekunjalo zazibula ngamaluba. Izingatsha khonapho lazo zabhensa sezisindwa ngamaluba. Ukhulu laye esibona sinjalo wasisitheka.
Phezulu emkhathini lakho zandiza izinyoni zezulu. Yiziphi lezonyoni? Funda uyiqede mfundi uzwe isiphetho sayo.
