uMthunywa
Indikimba – Ezemvelo
Imbongi nguPaul B Damasane
Isihloko senkondlo – Wamuhle Mamvula!
Kule inkondlo imbongi idumisa ubuhle bezulu lona elithi ngokuna lilethe injabulo ebantwini.
Imbongi iqala inkondlo yayo ibuka izulu ithi, “Wamuhle Mamvula!” Izulu ngolimi lwesiZulu bathi yimvula.
Lapha imbongi yona ilenza samuntu ilibiza ithi nguMaMvula, umama uMaMvula.
Ngesikhathi lingekho izulu, uMaMvula phela imbongi ithi kwasekunzima ukuphila.
Kunjalo sibili nxa izulu lingekho abantu baphila nzima ngenxa yendlala.
Indlala ihlasela wonke umuntu, abafokazana kanye lezipatsha.
Yikho imbongi ithi ngaleso sikhathi sobunzima kwakhala abantu kanye labantukazana.
Kwakhala izalukazi kunye lamakhehla, amaxhegu phela.
“Zalil’izalukazi lamakhehl’azo.”
Kwathi ngapha kwabatsha zambongoza izintombi lezinsizwa.
Umhlabathi lawo wadabuka waba miklewuklewu kwathi amatshe asala egcekeni kwaba ngamatshe indawo yonke.
Wathwasa umnyaka abantu bacabanga ukuthi uzafika lokuhle kodwa phinde libuye izulu.
Imbongi ithi zathwasa izinyanga basala sebempethwana lingekho izulu laze labamqhotho ilizwi elithi: “wena MaMvula ungumafunw’intandokazi kaSobantu.
Izulu lifunwa nguye wonke umuntu santandokazi kayise wabantu, uSobantu.
Iyasitshela ukuthi uMaMvula lo uza lehlobo. Selifikile izulu imbongi ithi bathaba santombi igcagca.
Sibona njalo ubuhle bemvelo nxa selinile izulu.
Amagatsha ezihlahla aqubuka ubuluhlaza tshoko.
Iwenza samuntu amagatsha ezihlahla lapho ithi aqhwebana amagatsha ngokuphephetha komoya adlaladla lkwezidandane zifeketha.
Nxa selinile izulu uMaMvula, umoya ezixukwini utshaya ikhwelo, imikhuna yezihlahlakazi iyatshibilika, ivume ngobutshwilitshwili bamagatsha abesomile kube samvokloklo umculo wabelusi.
Konke lokhu iyakubuka imbongi. Lokhu kufakazwa ngazwi ayo lapho ethi: “Kwazekwakuhle’ukwenza kwakho MaMvula/Umhlabathi lamahlabathi kuquketh’usi lwakho/ Lona lusi olungamakh’emvelo/Osuqhole ngaw’isandlesonke kwakuhle.”
Sekunje abantu sebehlobise ngehlob’elilomsutho lamanono. Ihlobo leli lekhaba selikhahlele indlala ekudeni.
”Imbongi ibona amanina nxa selinile izulu amanina esekikizela ebona ubuhle bezulu uMaMvula.
Ngakwesinye isandla lentombi lazo kuthiwa zaqolotsha okwethole libona unina okutshengisa ukuthi ziyabesezijabula izintombi ngoba zisutha.
Izinsizwa lazo zanethezela zabusa njengezakudala endulo.
Ngenjabulo leyo ingwevu, amaxhegu avusa ezindala ingoma. Lavungama idale bethi, “Woz’ubone-e-e! Benqolonga yona “Indaba engesiyo yomkhonto”.
Sekuvela sobala kusigaba sokugcina indumiso imbongi eyipha izulu uMaMvula ithi: “Hawu kwaze kwakuhl’ukwenza kwakho MaMvula! Nguban’ongembathis’umhlaba kanje?Awenz’ ubukeke ngalendlel’umhlaba?
