uMthunywa
Indikimba – Ezempi, Imbongi nguDumisani J Tshuma
Isihloko senkondlo –Engakubonayo
Kukhulu eyakubonayo imbongi ngesikhathi sempi. Impi igoqela ukuchitheka kwegazi elinengi kakhulu.
Iyalandisa lapha esiqala khona lamuhla ithi: “Yaqwaqwazana ezintabeni – Kwakhithika amadoda/Kwakhithik’amadod’amhlophe/ Kwadilika amadod’amnyama/Bakhubeka anancindi bensizi”.
Kumpi le eyabonwa yimbongi kwafa amadoda aNsundu , kwafa lamadoda amhlophe ngoba yibo ababesilwa.
Kwakuliwa ngezibhamu hatshi ngemiqwayi ngoba omunye engezwa elokuqwaqwazana ethi kumbe kwakutshaywana ngemiqwayi.
Kwakufiwa kusiwa amadoda nxa zonke.
Imbongi njengoba yayikubona lokhu kusenzakala yafikelwa lusizi, yakhala, yakhala. Iyagcizelela lokhu kukhala ithi yabihla yabihla.
Yakhala inyembezi zayo zaze zoma zodwa kungekho owayengayithulisa.
Ithi inhliziyo yayo yafutha yabhibhidla njalo yopha.
Yezwa ubuhlungu kakhulu imbongi ngeyakubonayo ukufa kwabantu.
Yahlaba umkhosi omkhulu ibona usizi olungaka.
Ibona lokhu imbongi ithi yabaphatha okhulu okutsho ukuthi yakhangelela kumadlozi akwabo, njalo yabahlonipha.
Ngenhlonipho leyombongi ichaza ukuthi yabancenga abaphansi (amadlozi akwabo).
Yehlisa inyembezi kwathi zona inyoka zesizwe sakwabo, wona amadlozi atshwaphuluka. Alahla izinyembezi yena wathuthumela.
Izinyoka lezo (amadlozi akwabo) zaquphuna imilalazi ebanzi zabalola abantwana benhlabathi.
Sekunjalo abantwana benhlabathi bakhukhumala samamba igxotshwe umsila.
Imamba yinyoka elolaka kakhulu okokuthi ungayigxoba umsila iyakugeca, ikuluma ngolunya olukhulu.
Imbongi iveza ulaka olwafikela abantwana benhlabathi ngesifaniso leso.
Sebevuswe ulaka abantwana benhlabathi imbongi ithi bakhif’ubuthi babheda, babheda bayadibana labamhlophe emaqaqeni.
Yabanzima impi eyaliwa lapho ngoba imbongi isebenzisa ihaba ithi kwaqanda litshisa.
Kwaliwa ilanga libalele.
Emva kwalokho kwasala abamhlophe belele. Lapha imbongi ihlonipha ukuthi abamhlophe basala befile. Kayifunanga ukukuthi bhadla lokho.
Igcizelela lokho ngokuthi abamhlophe basala belele kungaziwa ukuthi babezavuka mnyakana kutheni? Imbongi njengoba yazibonela lokho mathupha ithi: “Yalal’“ndoda yaziqethukela/Yaf’indoda amehlw’afohlabantu!”
Wehlulwa-ke umfokazana kuleyompi yemaqaqeni. Imbongi yabalombuzo ukuthi kambe lowo mfokazana uzayabhodla na? Iyaziphendula kulokho imbongi ithi ye uzayabhodla! Lowo mfokazana omhlophe phela kuthiwa uzayabhodla athulule lonke ulaka lwemamba esike sayiphatha ngaphambili lubuthe konke okuyimizana.
Kuyakutsha qhu, abhodle, abhodle-ke. Imbongi ithi: “Asazi, angazi kuyasongwa madoda!”
Abasongayo laba ngabamhlophe ngemva kokunqotshwa kwabo empini yemaqaqeni.
Sebehlulwe abamhlophe babebhidlisela kuzakhamizi betshisa imizi yabo.
Zwana okwalandelayo sisiya emaphethelweni ale inkondlo.
Yeyi, qaphela wena ubhubhane lweCovid-19 luqhubekela phambili lusidla amahabula.
Hlala uhlanzekile. Ungehlukani lesayeke sakho.
