uMthunywa
Indikimba – Ezempi
Imbongi nguN CG Mathema
Isihloko senkondlo – Impi
Nxa kuqanjwa igama elithi impi abanye bangalitshaya indiva leligama ikakhulu labo abangayibonanga impi kanye leziga zayo. Nxa kuthiwa impi lokhu kuvusa usinga kulabo abaphatheka kumpi yenkululeko yelizwe lakithi iZimbabwe. Kasilutho olulula impi ngoba kuchitheka igazi labantu abanengi nxa ithe yabakhona. Yikho labo abaphatheka kuyo labayibonayo bengakuthakazeleli ukuthi kuhlale kukhulunywa ngayo.
Banengi abantu abalahlekelwa yizihlobo zabo besegangeni kanti abanye balahlekelwa yizihlobo khona lapha ekhaya.
Impi nxa ithe yabakhona imisa izinto ezinengi ngoba kungela kuhlaliseka. Intuthuko kunye lengqubela phambili kuyama konke. Ngamafitshane ngivumelana layo imbongi ebethwe ngaphezulu ukuthi impi imbi. Lanxa imbi kuyafika isibanga sokuthi bazinikele kuyo bethi okungasikufa yikuphi?
Imbongi isivezela obala ukuthi imbi ngani impi. Imbongi ithi impi iyachitha, iyabulala njalo isanganisa ikhanda. Nxa imbongi isithi impi iyachitha itsho khonokho engikuqambe ngaphezulu okunjengokuthi nxa isikhona zonke izinto ziyama. Kungaba yizikolo abantwana besikolo bacina bengasafundi kuthi labasebenzayo abanye batshiya imisebenzi labo bayexhasana labanye ekulweni impi. Njengakuleleli elakithi amajaha lezintombi batshiya konke bayefundela ukulolonga ngezempi kwamanye amazwe.
Ngabanye ngabanye batshiya imizi yakwabo bayefundela ezempi kwamanye amazwe. Abazali batshiya abantwana kanti ngakwelinye icele abantwana labo batshiya abazali besiya empini. Kwathi amajaha ababelungiselela ukutshada batshiya konke lokho, yikho imbongi isithi impi iyachitha. Kayisibo bonke abantu abaphuma elizweni besiyadinga ukukhulula ilizwe kucindezelo abaphendukayo. Abanye basala khona empini okutsho ukuthi bafela khona abenelisanga ukubuya ilizwe selikhululekile.
Empini kuyabulawana yikho imbongi isithi impi iyabulala. Lanxa impi ibulala imbongi iveza ukuzinikela kwayo ekukhululeni ilizwe. Lokhu kuvela mgceke nxa imbongi isithi: “Kodwa elami ilizwe lihlaselwa/Lingenelwa laloba ngubani/Ngizimisele loba nini/Ukuyilwa impi/Ngigwaze ngiqhuqhumbise isitha.” Yikuzinikela kwendoda lokhu ukuthi ilwele inkululeko yelizwe layo. Iyagcizelela njalo imbongi ukuthi imbi impi.
Iqhubekela phambili ikhuthaza abantu ithi kodwa nxa kufanele kumele bengathikazi ngitsho lakancinyane. Ithi kumele bayilwe, babulawe labo babulale. Kayibuyeli emuva imbongi ekuthini impi imbi kodwa ithi kayisetshenziswe ekucineni nxa sekwehlule eminye imizamo yokuletha inkululeko.
Ipha isibonelo ithi njengalokhu okwenziwayo kulizwe lakithi leZimbabwe. Abalandela ezembali yempi yenkululeko bazavumelana layo imbongi ukuthi impi eyaletha inkululeko yaba yinto yokucina sekwenziwe inkulumo ezinengi khonapha ekhaya eZimbabwe kanye lamanye amazwe.
Qedisa isigaba sokucina lawe mfundi uhlolisise lokusetshenziswa kolimi.
Asilandeleni izixwayiso ezimayelana lobhubhane lweCovid-19 lokhe lukhona luthanyela abantu.
