uMthunywa
Indikimba – Ezokufa
Imbongi nguQiniso Mabhena
Isihloko senkondlo – Ukufa
Lamhlanje lokhe siqhubeka ngayo indikimba yokufa esiyiqale kuviki ephelileyo. Yebo ukufa yisiga esesabekayo esingajwayelekile kodwa siyafunda ngaso sixoxe ngaso ukuze sizwe ububi bakho. Imbongi lapha isivezela izinto ezithile ngokufa. Vula indlebe uzwe ukuthi kuthiwani.
Ukufa yinto engathandwayo yikho imbongi iqala ngokusitshela ukuthi ukufa kusoliwe indawana yonke. Akulamuntu okuthandayo ukufa, abantu baze bedlule ekukusoleni ukufa bakuhlambaze ngenhlamba zonke zomhlaba ungaka.
Lokhu kugcizelela ukuthi abantu bayakuzonda ukufa. Lanxa kunjalo kuthiwa imbongi zikuhayile ukufa.
Labahlabeleli labo kuthiwa aqongile amaphimbo bekuhaya ukufa.
Ziqhinqiwe izililo zivuswa yikho ukufa. Nxa kufiwe kuba lesililo esikhulu. Abantu baqhinqa isililo ngoba inhliziyo zabo zephukile zidabukile nxa kuqanjwa igama lokufa.
Kuthiwa ukufa kulenkani njalo kuyisiqholo. Imbongi itshengisa ubuqholo obungaphambili ngoba ibufanisa lesiqoqodo siqoqoda isigodo. Ngakho-ke kuthiwa akulandaba lokusolwa njalo kakudingi kuncengwa. Kungudazinkani untando kayiphikiswa kufakaza ukuthi kuzenzela umathanda emhlabeni ukufa.
Iyaphambili imbongi itshengisa ukuthi ukufa akudingi kuncengwa ngoba kuthiwa legabazi lokukhuluma lingeze lakuncenga ukufa. Njengoba kuyikho kodwa kungelanzalo ukufa kungeze kwaba lesihelo. Sihlezi nje njengabantu khona kusizungezile ukufa.
Nxa sihleka khona kuyasihleka ukufa. Nxa sikhuluma khona kukhuluma ngathi. Nxa sihamba khona kuyasikhokhela. Ekulaleni kwethu khona kusicathamele kukhetha okungambiza kumdobhe.
Iqiniso elikhona yikuthi uzulu wonke uyakwesaba ukufa kodwa uswele lapho angabalekela khona. Uzulu ufisa ijubane elikhulukazi elisiqubu sedlula esombane ukuze kuthi nxa kumlandayo ukufa akubalekele kusale kudanile.
Kodwa sonke siyakwazi ukuthi yizifiso lezi ngoba ukufa singeze sakubalekela kusidinga kusifumane yonke indawo. Akulakuthi uphezu kwentaba ende kulazo zonke emhlabeni kumbe enzikini yolwandle nxa sekumfuna umuntu kuyamthola kuphela.
Lanxa ukufa kusesabeka kuthiwa lowo okhethwe yikufa kakhathazeki emoyeni ngoba ulwazi luyabe seluphelile. Amehlo alowo osekumthatha kuwafiphazile lendlebe lazo kuzingcine ngci okokuthi lowo muntu kasezwa kanti lomcabango lawo kuyawulalisa ukufa. Nxa ukufa kuzuma umuntu umzimba uphumula okungelamkhawulo.
Imbongi lowo osebizwe yikufa uyazizwa. Uyezwa ukuthi usezakufa. Ngakwelinye icele abaphilayo kubasithekele ukuthi babone ukuthi babone lowo osezakufa.
Kabezwa ukuthi lo usezakufa ngoba bengayisibo abazakufa. Imbongi ikubeka sobala ukuthi singazi ngani ukuthi ofileyo ubesazi njengoba singakafi. Mfundi funda uyiqedise imbali yale inkondlo.
