uMthunywa
Indikimba — Ezilezikhalazo
Imbongi nguG Khiyaza
Isihloko senkondlo — Asikhumbuleni abangelalutho
NGOBANI labo okuthiwa ngabangela lutho? Abangelalutho ngabaswelayo abangenelisiyo ukuthola zonke izinto ezidingakalayo empilweni ukuthi umuntu aphile kuhle. Ukuswela lokhu kugoqela izinto ezinengi kodwa lapha ngizaqamba okumbalwa nje kuphela okunjengokudla, izigqoko kanye lokuswela indawo yoluhlala. Imbongi lapha ikhuthaza abantu ukuthi kabakhumbule abantu abanje abaswelayo.
Kuzibanga ezinengi bayakhohlakala abantu abaswelayo ngenxa yezizatho ezinjengokuthi lo kasweli wenziwa yibuvila kafuni kuzisebenzela. Imbongi ikhuthaza uzulu ukuthi siyizidalwa ezifananayo sonke. Sadalwa nguMvelinqangi sonke. Kulabo abangaqedisisiyo ukuthi ngubani uMvelinqangi kumele bazi ukuthi lo nguye uNkulunkulu obizwa ngamagama ambalwa agoqela wonalawa aseqanjiwe lala athi uMdali kumbe uSomandla. Kule inkondlo imbongi isebenzisa igama uMvelinqangi ekhuluma ngomuntu munye.
Iyaphambili imbongi ithi sonke sadalwa silezipho leziphiwo ezitshiyeneyo njalo sadalwa ukuba lapha emhlabeni sonke. Iyasikhumbuza imbongi ukuthi ngalokho-ke uMvelinqangi uyasithanda sonke! Iyawagcizelela amazwi la kuzigaba zenkondlo yayo yonke. Imbongi ithi yilowo lalowo wabelwa konke alakho ngokutshiyeneyo. Ngalokho ukwenza kwethu kutshiyene ngoba lathi ngokufanana sitshiyene. Siyakhunjuzwa njalo ukuthi uMvelinqangi usithanda sinjalo sitshiyene ngoba sadalwa nguye sitshiyene.
Iyawaphinda amazwi la imbongi: “Ngalokh k’uMvelinqang’uyasithanda sonke!” Imbongi isikhuthaza ukuthi asazisaneni loba siyizidalwa ezitshiyeneyo. Lokhu kungoba uMvelinqangi uyasazisa sinjalo sitshiyene. Ngeso linye lelo akungabi lihlazo ukuswela komunye kithi.
Akungabi yibuthutha ukuswela komunye kithi njalo akungabi yinto ecunulayo ukuswela komunye kithi. Akungabi yibuvila ukuswela komunye kithi. Lokhu kuza ngendlela esitolika ngayo komunye lomunye.
Ngike ngabetha ngaphezulu ukuthi sasisuke sithi ukuswela komunye yibuvila. Imbongi iyasifundisa ukuthi akungabi yikuthi mina engingaswelanga ngihlakaniphile. Iyaphinda njalo imbongi isikhumbuza ukuthi asikhumbuleni ukuthi sonke sadalwa silezitho leziphiwo ezitshiyeneyo. Ngalokho-ke ukwenza kwethu kuzakuba ngokutshiyeneyo ngoba lathi ngokufanana sitshiyene. Iyayiqinisa injongo yayo imbongi ngamazwi athi:
“Elimqoka lapha ngelithi: ‘UMvelinqang’usithanda sonke!” Imbongi izinikele ngesimemezelo sayo esithi: “Asikhumbuleni abangela lutho.” Lokhu kuvela sobala lapha ethi khona phezu kwentaba imi iyanqolonga. Ukunqolonga yikumemeza ngelizwi eliphezulu ukuthi abantu abanengi bezwe lokho ekukhulumayo. Inqolonga kuzo zonke izizwe zomhlaba icela ngoba kungekho ongayizwa nxa inyenyeza inganqolonganga. Iyachasisa imbongi ukuthi ngokunqolonga ekwenzayo kayigolombi muntu.
Kayiqali muntu. Iyaphambili imbongi ithi kayidingi kucaphula olaleleyo kodwa idinga ukuzwisiseka kuhle kolaleleyo ezwe ukuba kayizondanga kodwa idanile. Iyaqhubeka imbongi ithi kayihlukuluzi kodwa iyancengancenga. Isichayeke sobala linkondlo bafundi ukuthi selingayiphutshisa.
Ubhubhane kweCovid-19 luyaphambili, ngalokho kasivikeleni ukumemetheka kwalo ngokulandela iziqondiso zonke ezivela kwabezempilo.
