Giya Mthwakazi — Iqoqo lezinkondlo Ugwalo ludindwe yiLongman Zimbabwe

19 Mar, 2020 - 00:03 0 Views
Giya Mthwakazi — Iqoqo lezinkondlo Ugwalo ludindwe yiLongman Zimbabwe

uMthunywa

Indikimba – Ezisolayo

Imbongi nguRobert N Mele

Isihloko senkondlo — Ingozi yemvelo

IMBONGI kule inkondlo ikhuluma ngolutho esingalunanzeleliyo, Ingozi yemvelo. Umbuzo esingaba lawo ngothi: “Yingozi bani le imbongi ekhuluma ngayo iyibiza ngelithi yingozi yemvelo? Nxa siyifunda sisehla layo inkondlo le sithola ukuthi le yingozi yemvelo ngokuzalwa. Nxa sihlolisisa kuhle yingozi yemvelo ukuthi sazalelwa kuleli lizwe elibizwa kuthiwa yeZimbabwe. Lanxa ingayiqambanga bhadla ukuthi ingozi yemvelo ngokuzalwa le eyokuthi sazalelwa lapha kwelakithi amazwi ewasebenzisayo imbongi akuveza mgceke ekuqaleni kwenkondlo lokhu.

Zwana amazwi alandelayo: “Nansi ingozi yemvelo Mthwakazi/ Iphahlwe nguGwembe loNgulukudela”. Ilizwe lethu leZimbabwe liphahlwe yimifula uGwembe usiyangenyakatho loNgulukudela usiya ngeningizimu. Sizalelwe kulelilizwe eliphahlwe yile imfula. Le yingozi ekubani lobani koMthwakazi ungathandi, uthanda ingawe. Yikho-nje imbongi isithi: “Akelibone/ Ingozi yemvelo ngokuzalwa komuntu.”

Ngamanye amazwi umuntu kazikhetheli lapha afuna ukuzalwa khona ngoba lokho kuyingozi yemvelo. Iyabuza imbongi ngembuzo engadingimpendulo ukuthi: “Ngubani owayengathandi le ingozi? Pho yathandwa ngubani Mthwakazi? Iyaziphendula imbongi kule imibuzo isithi le yingozi yemvelo ebantwini bonke eyokuzalwa ngumhlobo othile elizweni. Ngalokho-ke yingozi yemvelo lapha koMthwakazi.

Imbongi ikhumbuza abantu ukuthi bazalwa bensundu njalo bansundu ngokudalwa. Uzulu munye ngoba unsundu ngomdabuko. Zinengi indimi ezikhulunywa ngabantu ngoba kuyingozi yemvelo lokho. Wayengekho owayengaxwayana lale ingozi ukuthi azalwe engumhlobo othile koMthwakazi. Lokhu kuveza sobala ukuthi akekho ongaxwayana lengozi yemvelo. Iqhubekela phambili imbongi ikhuthaza ukuthi abantu abaNsundu kababambane ngebumba labo elimnyama batshiye ukukhethana ngemihlobo.

Imbongi ukhuthaza ukuthi abantu abaNsundu babambane hatshi ukubandlululana ngemihlobo ngoba inkethabetshabi ibulele isizwe.Inkethabetshabi le kuthiwa yisifo esibi semvukuzane emuntwini oNsundu. Imvukuzane ngumkhuhlane omubi emuntwini ocubuza umzimba okungangokuthi nxa inkethabetshabi ifananiswa lawo kutshengisa ukuthi yinto embi kakhulu ebulala isizwe ngoqotho. Isifo lesi kumbe ngithi yona inkethabetshabi yadalwa yingozi yemvelo.

Iyagcizelela imbongi itshela isizwe esiNsundu ukuthi kasibambane sazisane njengobunyonyo. Ithi kasikhohlwe ngengozi yemvelo isizwe esiNsundu. Ngebumba eliNsundu kasiziqhenye kwezinye izizwe sona sizwe esiNsundu. Ebunzimeni imbongi ikhuthaza abaNsundu ukuthi kabazisane bahlomisane babenyandanye, bakhohlwe ngomhlobo. Imbongi ikhuthaza isizwe esiNsundu ukuthi yebo ngeqiniso indimi zaso zinengi, amasiko lawo ngamasiko ngokudalwa kodwa iqiniso lona lithi: “Nsundu umunye/ Kusukela kuGwembe kusiya kuNgulukudela/EMtali kusiya ePramu umunye/Ngengozi yemvelo likhohlwe bo”.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds