Giya Mthwakazi Iqoqo lezinkondlo Ugwalo ludindwe yiLongman Zimbabwe

20 Feb, 2020 - 00:02 0 Views
Giya Mthwakazi  Iqoqo lezinkondlo Ugwalo ludindwe yiLongman Zimbabwe

uMthunywa

Indikimba — Ezokunakana

Imbongi nguArtwell T Masuku

Isihloko senkondlo — Cabanga

KULE inkondlo kukhuluma imbongi uMasuku kumbe omunye umuntu exwayisa intombi nje jikelele ukuthi kazivuse inkophe zihlakaniphe zekele ukuba yiziphukuphuku (izithutha). Imbongi iqala inkondlo yayo ngombuzo ibuza ukuthi yini ndaba intombi ziyiziphukuphuku kanje? Ngumbuzo ongadingimpendulo lo ngoba imbongi iphinda iziphendule yona ukuthi ihloseni ngalowo mbuzo.

Imbongi ikubeka sobala ukuthi yini ndaba intombi zivumela ukuthi ingqondo lemicabango kuzibuse. Isibuze intombi zonke nje jikelele, isixwayisa udadewabo mathupha oseduze layo ukuthi kalimuke inkohliso. “Kuwe dadewethu ngithi/ Limuka inkohliso”. Kukhona abakhohlisa intombi ngalokho imbongi itshela udadewabo ukuthi kalimuke angaze akhohliswa. Iyaqhubeka imbongi iveza leyo nkohliso engavelela udadewabo.

Izolo ijaha limthembisile udadewabo ukuthi bazatshada kumbe lizamtshada, ngobuwula udadewabo uvumele phezulu esizwa lokho. Ujabule kakhulu udadewabo esizwa lokho. Uthabe wamanzi wayabamba amayezi. Lokhu kufakaza ukuthi udadewabo uthabe okwamagama waphosa wayabamba isibhakabhaka. Lihaba leli eliveza ukuthi ukuzwa elokutshada udadewabo uthabe kakhulu weqela phezulu ngenjabulo.

Ngenxa yokujabulela ukutshadwa laye uvumile udadewabo wembongi lakanye lamvuma igama elithi vumisile. Ikhangela imbongi ibona udadewabo ezivakatshela othi nxa ethi uyananzelela ibona nantiya ijaha lakhe ebelithi lizatshada laye selitshada lenye intombi uThembisile. LinguMkhohlisi leli jaha yikho imbongi isimbiza ngegama elithi Mkhohlisi. Ngumkhohlisi ngeqiniso ngoba ubethembise udadewabo kodwa nanguya usetshada loThembisile.

Ebona lokhu udadewabo wembongi uzonda kakhulu. Imbongi ikufaka ngesitsho lokhu lapho ethi, “Uzond’uzuphos’udl’inja”. Inja kayidliwa ngezibanga ezinengi. Ngalokho imbongi nxa isithi udadewabo uzonda aze aphose adle inja kuveza inzondo enkulu kakhulu abalayo ebona lokho. Umzwangedwa lawo uthi khonapho uphose umlahle phansi. Nxa ebuza uMkhohlisi ukuthi sekuhamba njani amtshele ukuthi nguye yedwa.

Udadewabo athi esizwa lelo elokuthi nguye yedwa axole athi uphosisile yena Mkhohlisi. Usuka lapho ahlale udadewabo athembe ize aqinele elokuthi kusasa bazatshada. Namhla izinto seziguqukile kalisekho ithemba abe lalo. Ufunyanwa ethukuthele udadewabo wembongi okwenza imbuze: “Lamhl’uthukuthele kutheni/ Wenzani dadeweth’unath’itshefu? Wenzan’uzam’ukuzi bulala?” Uzonde kakhulu udadewabo wembongi ngenxa yenkohliso yokuthi uzatshadwa kujike kubesobala ukuthi ubekhohliswa nje kuphela.

Imbongi isimazisa ukuthi kanti kazi na ukuthi phakathi kothando lwezithandani kuvutha ilangabi lenkohliso. Isimxwayisa udadewabo imbongi ukuthi angatshayi uSithembiso ngoba ukhonjisiwe njengaye. Wathandwa laye wathanda uSithembiso. Iyamtshela njalo udadewabo imbongi ukuthi kalamandla okumthonisisa uSilibaziso ngoba uMkhohlisi kamlobolanga. Imbongi iphetha ngokuthi, “Cabanga” kudadewabo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds