uMthunywa
Indikimba — Ezothando
Imbongi nguDavid E Ndoda
Isihloko senkondlo — Uthando
LINANZELELE bafundi ukuthi inkondlo lezi sizicupha kuzindikimba ezitshiyeneyo singalandeli indlela yokuthi ziyalandelana kumbe hatshi. Abananzelelayo bazabona ukuthi siyacupha kweziphambili sijike sizohlaziya ezekuqaleni njalo. Kungalikhathazi lokhu bafundi kodwa lina qinani kuzindikimba kuthi ezifananayo lizitsho ukuthi ziyafanana ngalokhu lalokhuya. Kubenjalo lakwezinye ezikhuluma ngento efananayo kodwa zehlukene ngendlela ezithile.
Kasigiyeni siyephambili lamhlanje ngenkondlo kaNdoda ekhuluma ngento enhle ekhwabithwa ngabanengi uthando phela. Uthini ngothandi okaNdoda? Ngombono kaNdoda uthando yinto eligugu kakhulu nanku uyibiza ethi: “Thando notho kazulu.” Uqhubekela phambili ethi uthe yinduduzo yentando yothando. Uyaphinda ethi yinjabulo yothando ukuthanda. Kuthiwa uthando kuyisipho esingelansumansumane okutsho ukuthi uthando kuyisipho esingelahlupho esingeladubo kulowo othe wasiphiwa.
Lapho olukhona yonke into iphelele akula okusileleyo. Lokhu sikuzwa kumazwi embongi nxa isithi uthando luyisilinganiso sokupheleleyo kodwa. Uthando lolu lulithemba lalabo abathembayo bodwa. Ngamanye amazwi labo abangathembi kulo uthando kalisithemba kubo. Uthando luvala yonke into eyangisayo ehlazisayo. “Sibekelo sakho konke okuhlazisayo”. Uthando luyalolonga lucolisise konke okudidayo. Lapho olukhona uthando konke okudidayo kuyaphela ngoba uthando solukulolongile lwaqondisa lapho obekugobe khona.
Lapho olukhona lubethela isikhonkwane enhliziyweni yalowo olalo anganyikinyeki. Lapho olukhona uthando luvala wonke amagama enzondo. Akuzwakali magama enzondo lapho olukhona uthando. Bayakhuluma abantu ngalowo othandiweyo bethi ngeqiso mubi ukhuza impisi kodwa lowo othandayo uyakuphika lokho ethi: “Thando Ngilosi phansi kuwo ngawo”. Lanxa besibabaza ngobubi baso isithandwa salowo othandayo yena ujinga esala ethi esakhe isithandwa sihle okwengilosi.
Lanxa besitsho abantu bethi akulalwa kosithandwa sakhe okutsho ukuthi kabalali ngoba bethakathi ngenxa yothando lo othandayo uthi yena uthi uzaqutha labakwabo besithandwa sakhe. Bayaphambili bechothoza isithandwa sakhe bethi kasiziphathanga libele lendlela yena uyakuphika lokho ngenxa yothando ethi: “Sobandlela-nye ngawe thando.” Izinikele imbongi ukuthi bangaze bathini labo abachothosa isithandwa sakhe kasoze asitshiya bazahamba bonke kuleyo ndlela enza bethi isithandwa sayo silibele lendlela.
Akula kuthula nxa uthando lungekho. “Kuthula bani ungekho thando?” Lenhlonipho kayikho nxa uthando lungekho. “Nhlonipho bani ungekho thando?” Imifula enjengabo Ngwigwisi igcwele ithwele izigodo lanxa emathambothambo uyaziphosela kuyo efuqwa luthando ukuthi ayebona isithandwa sakhe. Kwala lanxa sebekhuluma ngobuyanga obukwabozala kwalo othandaweyo uzimisele ukuthi kungcono bayekhandana bebonke. Ngenxa yokuzimisela kwalo othandayo imbongi iyabuza ukuthi lunganani loluthando.
Idinga ukwazo imbongi ukuthi lumbala muni lolothando njalo ngamehlo bani alubonayo. Iyabuza njalo imbongi ukuthi luyisimo bani njengoba lunzima nje?
