uMthunywa
Imbongi nguNdabezinhle S Sigogo, Isihloko senkondlo – Ehlobo
Ehlobo yisigaba somnyaka esithandwa ngabantu bonke. Ngesikhathi sehlobo umhlaba muhle ngoba konke okukuwo kutshengisa impilo. Umhlaba wona ngokwawo ugqokile (uvathile), ubalaziwe ngoba izihlahla zilamahlavu ayimibala etshiyeneyo.
Kuloqhatshi olumnandi oluzwakala nxa uhamba phandle ngoba kungamaluba ezihlahleni ezinengi kanye lotshani labo buyabuzela phansi ingqe kulobumanzi phansi.
Imvelo yonke inhle ngehlobo ngoba labantu labo bayacwazimula ngoba besutha. Ukudla kunengi okwabantu kunye lezinyamazana zasendle.
Imbongi le esingayo lamhlanje layo iyakwemukela lokhu, iyalidumisa ihlobo ize ithi: “Umoya wam’uyakhudumala/ Nxa ngibon’imigang’eluhlaza/Engingazi laph’ecina khona/ Ngibona imiful’egcweleyo/Kanye lamabel’avuthiweyo/ Emasimin’abantu bakithi/Ngiwabuka ngikhumbul’okhokho”.
Giya Mthwakazi
Nxa sifunda lesisicaphuno sibona imbongi imile etshatshalazini ibuka imvelo konke kukuhle nje! Ngendlebe zayo imbongi izwa amanina ephakathi kwentokozo yehlobo ehlabelela ngapha efulela abantwana ihlobo.
Lokhu kutsho ukuthi omama bayahlabelela bedobhela imuli zabo izinto zehlobo eziyodliwa ngekhaya. Nxa imbongi ikhangela ezihotsheni ibona izinkomo zihaphuna utshani ngemilomo.
Utshani labo ibubona buguqe ezindleleni buyikhonza imikhizo yezulu lona elize lobuhle behlobo. Ngesikhathi sehlobo utshani labo bude buze bungene lezindleleni butshengisa ukujabula yikho imbongi ikufanisa lokuguqa. Izulu kanye lemikhizo ena ngehlobo yenza imvelo yonke ibukeke.
Iganga lonke limalubaluba nxa imbongi ikhangela. Nxa iganga lonke limalubaluba wona-ke akhanga izibungu kanye lezinyosi.
Nxa ikhangela ngakwelinye icele imbongi ibona izinyamazana lazo ziqolotsha zisuthi khona ukudla kwehlobo. Amagogo lawo (abanye bethi zimbuzi zentaba) ematsheni ezintaba enza’ okwenkolon; ezimunywini zisiyabatha ezifuleni. Imbongi iyaqhubeka ithi yonke imvelo iyakhankazela ukudla.
Okunye lokunye kudla okunye ngumthetho weguswini lowo owokuthi inyamazana ezingelamandla zidliwa ngezilamandla kulazo eguswini.
Imbongi ithi ngokufananayo izintaba zimelene, zijamelene. Lokhu ikufakaza ikhangele intaba zikumacele emfula etshiyeneyo. Imbongi ithi enye lenye intaba ikwelinye iphetsheya ingathi isongela engaphetsheya kubangwa ilifa lezintabeni.
Imbongi ithi ngamakhala ayo amakhulukazi ihotshe umoya inuka mnandi yezwa legazi layo ligeleza okwamanzi emfuleni yawo. Yonke le injabulo iyinikwa lihlobo imbongi.
Ngenxa yehlobo imbongi ithi kufike uthando engalwaziyo, umoya wayo wagcwala intokozo. Ngalokho-ke imbongi ithi umoya wehlobo uzala uthando.
