uMthunywa
Indikimba – Ezenkolo, Imbongi nguRobert N Mele
Isihloko senkondlo – Madlozi akwethu
Inkondlo le siyifunde saqala ukuyicubungula kuviki ephelileyo lapho esizwe khona imbongi ibonga, idumisa amadlozi akwabo ngalokhu okuhle abayenzela khona. Sizwile imbongi ithi amadlozi akwabo ayivikele kunswelaboya ezingela nhlonipho njalo bona abakhumbula ububi lenzondo. Yathi bona ababi balenhliziyo eziqophe abangela cala.
Imbongi yayicela amadlozi akibo ukuthi ayikhuphe kubantu labo abambaxa mbili njengolimi lwezinyoka, imilomo yabo egcwele ngobuhlungu bebululu. Iyacela imbongi ukuthi amadlozi akibo ayigcine ingangeni ezandleni zababi. Iveza onala imbongi ukuthi amadlozi akibo ayivikele kwabangathandi ukuthula lapha emhlabeni, bona abafisela ukuyikhubaza kuzo zonke indlela ehamba ngazo.
Lanxa izitha zembongi zifake izifike lamambule endleni zembongi, imbongi iyawabonga amadlozi akibo ayivikeleyo kwathi zona izitha zabuna. Zibuna nje izitha lezo ngoba amaqhinga azo okulimaza imbongi esehlulekile. Iyatsho imbongi ukuthi zehlulekile ukuquma ikhanda layo izitha zayo. Zehlulekile izitha ukwenza okubi kumbongi ngoba amadlozi akibo elayo ukuphuma kwamalanga wonke.
Iqhubekela phambili idumisa amandla amadlozi akwabo ngoba emvikela. Imbongi ithi yaphepha ezingozini ngoba amadlozi akibo elaye. Bathe labo abamzondayo sebehlulekile lokho abebekuzama bayikhangelela phansi imbongi.
Imbongi ikhuthaza amadlozi akibo ukuthi angavumeli inkanuko zababi ziphumelele. Ithi ububi lobo ababufisela kiyo imbongi abuphendukelwe kibo.
Giya Mthwakazi
Iyaphambili imbongi ithi labo abayifisela okubi abathwale lawo malahle abomvu ngawabo amakhanda bezwe labo ubuhlungu abayifisela bona njalo bakhawule. Ibafisela okubi laba bantu abayizondayo ize ithi imilomo yabo ekhuluma okubi ibaphendukele ngoba beyifisela ukuhlupheka lokufa eyakhe impilo yonke.
Itshengisa ukubacunukela labo bantu abayifisela okubi ngoba ithi akuthi nxa kungaba lamalahle atshisayo phezulu kwabo ehliselwe batshe babhujiswe njalo baphoselwe emagodini amnyama angela mpilo bengaphindi bavuswe ngoba bebabi inhliziyo zabo.
Konke lokhu imbongi ithi kungenxa yokuthi bamfisela ukuhlupheka lokufa kweyayo impilo. Iyagcizelela imbongi ithi: “Uhlupho kuwe ongifisela ukuhlupheka. Iyakholwa emadlozini akibo imbongi yikho ithi:
“Madlozi akithi ngilikhumbula nsuku zonke. Lina elingivikela kwezami izitha ngalikhumbula.” Iwatshela amadlozi akibo imbongi ithi iyothwala leyana nkezo ikhafula.
Iyaqhubeka imbongi ibikela amadlozi akwabo ukuthi yavuvuzela igwayi phansi kuleyana ndawo ayaziyo amadlozi akibo. Iyasitshengisa lendlela ethethela ngayo amadlozi akibo ithi utshwala yabapha ngokubuchithela phansi ngoba lokho kungumdabuko emadlozini.
Iyephambili njalo iwadumisa amadlozi akibo imbongi.
