Giya Mthwakazi: Iqoqo lezinkondlo…Ugwalo ludindwe yi Longman Zimbabwe

24 Jun, 2021 - 00:06 0 Views

uMthunywa

Indikimba – Ezomanyano
Imbongi nguFerdinand Namate Ndlovu
Isihloko senkondlo – Isivumelwano sokumanyana

Nanzelelani bafundi ukuthi le ngenye yezinkondlo phakathi kwezithile ephathelane lembali yelizwe lakithi leZimbabwe. Njengezinye inkondlo ikhuluma ngokumanyana kwesizwe. Ukubambana kwabantu beZimbabwe kungelani lemihlobo kodwa bemoya munye njengaleya inkondlo esiyichasise ngeviki ephelileyo elesihloko esithi.

“Imoyamunye iZimbabwe”.

Kule inkondlo imbongi isikhumbuza ngesivumelwano sokumanyana esalotshwa ngamabandla amabili alwela inkululeko yeZimbabwe i (PF-ZAPU le (ZANU) abumba ibandla linye i(ZANU-PF). Sekwenzakele lokho imbongi ikhuthaza abantu ukuthi bakhohlwe ngokwenzakale kudala. Imbongi ithi masingadingi izehlakalo ebezikhona izolo ngemva kwalesi sivumelwano somanyano esabakhona ngomnyaka ka1987, kumhlaka 22 ngoMpalakazi.

Iyaqonqosela imbongi ithi lokho akubuzwa muntu ukugegedela kwelizwe ebelimi ngezinyawo. Lokhu kutsho ukuthi kungakabi lesivumelwano lesi bekungelakuhlaliseka elizweni lakithi leZimbabwe njalo akudingi ukuthi abantu bakhunjuzwe ngalokho ngoba bekwazi obekusenzakala.

Ilokucunuka imbongi nxa ikhuluma ngalezo zehlakalo ngoba ithi ilizwe belimi ngezinyawo ngenhlanya ebeziquma abantu amakhanda. Imbongi iqhubekela phambili iveza ububi obebukhona kungakabi lalesi sivumelwano sokumanyana lapho umuntu obegeca uyise ngehloka amhlahlele.

Lezi yizinto ebezisenzakala kungakabi lesivumelwano somanyano ebezihlasimulisa umzimba. Iyaphambili iveza ububi obuphambili obebusenzakala. Lokhu imbongi ikuveza ngembuzo ethile engadingimpendulo kodwa etshengisa sobala izenzo zobubi. Zwana alapha ethi khona: “Mingaki imiz’etshiswe ngabanikazi? Yaloba kwaloba langengan’ezimsulwa . . .” Lapha imbongi itshengisa ukuthi ngokungahlaliseki kwelizwe kungelamanyano kuchitheke izinto ezinengi.

Ngomoya omubi obukhona abantu abanengi batshiselwe imizi yabo kwafa konke lezingani ebezingelacala. Imizi ichithekile abantu beyitshiya beduha lelizwe lokho imbongi ekufanisa lokuhlakazeka komhlambi wempala zona ezingelamuzi ezithi nxa sezibalekela isitha zihlakazeke ziduhe zigcwale iganga lonke. Imbongi ipha omunye umfanekiso ichaza okwenzakala ebantwini ngenxa yokubalekela ukufa ithi abantu badana baduha njengamazinyane amagogo.

Kulabo abangaziyo amagogo zinyamazana leziya ezitholakala entabeni ezinjengembuzi. Imizi eminengi yaphenduka amanxiwa ngoba abantu sebebalekile ukuze bavikele impilo zabo njengoba elizweni besekungene utshaba kuchitheka igazi. Bafile abantu abanengi baswela abangcwabi njengoba bekugijinywa kubalekwa.

Amathambo alabo abafayo atholakala ndawonye lawezinyamazana zona ezifela egangeni kungabikhona olondoloza amathambo azo.

Kwathi labo abasilayo kulolutshaba babaleka bayaphephela kwezinye indawo. “Kwathi lab’abasilileyo bantshuma?”

Inde linkondlo bafundi qhubekelani phambili liyihlaziye lizizwele ngembali yomanyano.

Qaphelani ubhubhane lweCOVID 19. Imfundo kwabaphilayo hatshi kwabafileyo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds