uMthunywa
Indikimba — Ezothando
Imbongi nguB Mdlawuzo
Isihloko senkondlo — Uludonsi bani wena?
KULE inkondlo imbongi ikhuluma ngothando. Lutshengiswa lukabili lapha uthando lolu. Ngakwelinye icele luletha injabulo, intokozo, kumbe ukuthaba okukhulu. Ngengxenye luletha ukudana ngoba lapha olungekho khona luyamdabula inhliziyo lowo oludingayo.
Imbongi ifananisa uthando lodonsi lona olutholakala enyosini. Uluju lwenyosi lumnandi kodwa abantu baluthola nzima ngoba baluthapha inyosi zibaluma abanye baze bavuvuke lapha ezibalume khona.
Kodwa esikuzwa lapha kukhanya kwehlukile kudonsi lwenyosi lona olutshiya umuntu evuvukile. Imbongi iyabuza-ke, “Uludonsi bani wena?” Kungani imbongi ibuza umbuzo lo?
Ibuza nje imbongi ngoba ibona isimanga udonsi oluluma kungavuvuki.
Udonsi lolu okukhulunywa ngalo lapha luluma kungavuvuki kodwa kumemetheke injabulo. Kugcwala injabulo kuyo yonke indawo kodwa leyo njabulo izwiwa ngababili kuphela.
Bebabili enjabulweni ngoba sebenyamanye, benyamanye ngoba sebebumbene. Yibaphi lababantu? Yizithandani, abantu abathandanayo, ijaha lentombi yalo. Imbongi isitshengisa omunye umhlobo wodonsi, yona ethi luyinkinga yensumansumane.
Into eyinsumansumane ngengazwisisekiyo kumbe engaqedisisekiyo. Okumangalisayo yikuthi uzulu uludinga ngamehlo abomvu lolu donsi esesilubonile ukuthi luthando. Uyaludinga uzulu uthando.
Uzulu udinga uthando lolu yonke indawo. Indawo lezi kungaba semabhasini, ezititshini kanye lasemithonjeni. Izibonelo eziphiweyo lezi zifakaza ukuthi uthando ludingwa kuzo zonke indawo lapho okuhlangana khona abantu.
Uthando lolu olubizwa ngelodonsi luyakhethwa ngabantu lanxa lona lungakhethi. Uthando lukhethwa yiyo yonke imihlobo yabantu labavela kuzindawo ezitshiyeneyo zomhlaba.
Abantu abamnyama, abamhlophe, labavela empumalanga lakumagumbi wonke womhlaba bayalufuna uthando. Kuyayimangalisa lokhu imbongi ize ibabaze ngombuzo ithi: “Ha! Kant’vel’uludonsi bani wena?”
Uthando lanxa luletha injabulo kodwa olwalayo uthando lumdabula inhliziyo okutsho ukuthi lowo owaliwa luthando uzwa ubuhlungu obukhulu. Lowo othe wavunywa luthando uyathokoza kakhulu aze akhale inyembezi zentokozo.
Bayakhala abanye abantu nxa bephakathi kokuthaba okukhulu, yikho lapho okubonakala khona inyembezi zentokozo.
Ilesixwayiso imbongi kulabo abadlala kubi lothando ukuthi bayalimala. Abadlala kubi lothando yilabo abangaziphathiyo abathanda ngapha langapha. Balimala ngokulwela izithandwa kumbe njalo ngokuthola imikhuhlane.
Umuntu othi esethandweni alutshaphaze kuyamtshiya, luyaphela asale ekhala ngalo lungasekho.
Bayaxabana abantu abasethandweni ngoba kungasela kuthembana selutshaphaziwe ngomunye behlukane asale esekhala owaliweyo. Lanxa kunjalo imbongi itshengisa ubuhle bothando lapho oluthe lwaqina khona, wakhe umuzi kwabakuhle wanethezela.
Luyabe lulume kwabamnandi loludonsi. Lulumile lolu donsi oluluthando ngakwelinye icele wachitheka umuzi wakhe ngenxa kanyanewabo.
Omama abasethandweni abazebafuna kube lembangi, onyanewabo.
Kungaba njalo uyachitheka umuzi. Udonsi lolo selulume kwachitheka umuzi. Selingaphutshisa inkondlo le bafundi.
