uMthunywa
Indikimba – Ezomanyano, Imbongi nguArtwell T Masuku
Isihloko senkondlo – Siyabonga iUnity bakhokheli
Ngombono wembongi lesivumelwano seUnity sasiyinto enkulu kakhulu ebantwni beZimbabwe yikho imbongi ithi kabalazo izinkulungwane kumbe zimali kumbe yimilomo yokubonga. Ngalokho-ke sizwile imbongi isibuza bona abakhokheli ukuthi kambe baphe sipho bani babonge ngani lowo msebenzi omkhulu kangaka owokuletha ukubambana kwesizwe i(Unity).
Iyaqhubeka imbongi ngokutshengisa injabulo ngalo umsebenzi ukuthi kambe bacule maculo bani? Iyaphambili imbongi idumisa labo bakhokheli ithi bayisizwe bona ngokwabo. Sibonile ngaphambili ukuthi imbongi idumisa bobabili abakhokheli abaletha i(Unity) uMugabe loNkomo. Uyamdumisa uMugabe ethi: “Siyakuhlonipha Cde Mugabe/Siyabonga, siyabonga”.
Umuyi uJoshua Mqabuko Nyongolo Nkomo.
Iyaphambili imbongi ithi isizwe sikaMugabe siyabonga afake omunye wabakhokheli uJoshua Nkomo ethi: “Siyajabula isizwe sakho kaNkomo”. Imbongi ifanisa ukujabula kwabantu bejabulela lokho kubambana lokuqolotsha kwamankonyane. Siyasiwabone amankonyane ukuthi aqolotsha njani ngesikhathi esutha eqeda ukumunya kubonina.
Baqolotsha nje abantu yikubonga ngapha langapha. Yimihlangano yenjabulo isizwe sonke. Imihlangano le ngeyokuthokozelela ukubambana kwesizwe i(Unity). Imbongi iveza ukuthokoza okukhulu ngenxa yalesi sipho sokubambana abasiphiwe ngabakhokheli ize ithi: “Kambe sihloniphe ngani Mugabe/ Sikuphe yini yona eyethu imizimba?”
Lowo ngumbuzo ongadingi impendulo ogcizelela injabulo enkulu yembongi ize ihlabe umkhosi ithi, “Oh-waze wajabulisa isizwe sakho.” Iyaqhubeka imbongi iveza ukuthi zonke izizwe zeZimbabwe zajabula. “Kwajabula iShona, iNdebele, iKalanga, iTonga”. Iyakuchacisa ekutshoyo imbongi ithi itsho yonke imihlobo yesizwe seZimbabwe.
Iyaphindaphinda imbongi ukubonga kwayo itshengisa injabulo enkulu ngamazwi athi: “Siyabonga, siyabonga, wensizwa yomuntu”. Iyasitshela njalo imbongi ukuthi kwabalilanga elikhulu lelo lajabula ilizwe labakhokheli bomanyano oMugabe loNkomo. Ngokunjalo kwaze kwajabula yena uMdali wento zonke, uNkulunkulu, uMvelinqangi.
Umuyi u RG Mugabe
Ngesenzo lesi siyezwa ukuthi kwachelesa wona amaqhawe alele emaguswini esitsho labo bonke abafela uzikhulule kundawana zonke zelizwe kumbe umhlaba. Isiwaveza mgceke lawo mabandla aletha ukubambana. Ithi kulabo abalele kundawo ezitshiyeneyo bayathokoza ngokubambana kwamabandla wona amabili aziwayo.
Iyawaveza ngokuthi kunzima ukuchasisa ngoba wonke ofunda linkondlo uyawazi; iZanu-PF kumbe PF-Zapu. Imbongi yenza angani ayifuni kuwaqamba kodwa iphinde ithi: “Ngibona engathi yiwo kanye mfanyana/ Ngiyaphupha kumbe yiwo mfowethu/ Yiwo kwaze kwaphendula uNehanda/ Wona kanye bedumelana loMzilikazi.
Imbongi iphetha leso sigaba ngokusitshela ukuthi labo abathungameli besizwe seZimbabwe labo bayathokoza. Ibafakela amazwi ithi bayatsho bathi, “Siyabonga, siyabonga.”
