uMthunywa
Indikimba – Ezomanyano: Imbongi nguArtwell T Masuku
Abafundi abalandela la amakhasi bazananzelela ukuthi inkondlo le sike sayithinta ngaphambilini kodwa kasizange siyicubungule siyeyiphetha. Yikho esizazama ukwenza lamhlanje. Lapha imbongi idumisa abakhokheli bamabandla ezombusazwe bona abaletha ukubambana kuZulu weZimbabwe. Kusetshenziswe ibala lesilungu elithi, “Unity” lona litsho ukubambana kwabantu abebelembono etshiyeneyo.
Sesizihlolile inkondlo ezithile ezilesifundo esifananayo. Sizwile ukuthi iUnity le eyabakhona yaletha dumo bani elizweni. Imbongi ithi, “Siyabonga iUnity bakhokheli”. Imbongi iqala inkondlo yayo ngokusebenzisa amazwi amakholwa ahlangana lawo encwadini engcwele iBhayibhili lapho ababonga khona uMdali wabo uNkulunkulu lendodana yakhe uJesu Krestu ngomusa ebenzela wona bethi baswela imilomo ezinkulungwane ukuthi bayidumise iNkosi yabo ngalowo musa ebenzela wona.
Ngamazwi lawo imbongi ipha isisindo sesibongo esipha abakhokheli belizwe lakwabo ngento enhle abayilethelweyo iUnity, ukubambana. Lapha imbongi ingabe iveza ukuthi abalazo izinkulungwane zamadola abangabonga ngawo abakhokheli laba ngaleso sipho esihle esimangalisa kangaka esibalethele ukuthula kanye lenhlalakahle. IUnity le ekhona ingaphezu kwezinkulungwane zamadola abangazidinga babhadale abakhokheli abalethe ukubambana.
Ngombono wembongi ukubambana lokhu kungaphezu kokubhadelelwa ngezinkulungwane zamadola. Iyababuza imbongi laba bakhokheli ukuthi njengoba lesi kuyisipho esikhulu kangaka njalo bengalazo izinkulungwane zemali abangabhadala ngazo laba bakhokheli, iyabuza -ke imbongi ukuthi bengaba bonga ngani labo bakhokheli. Njengoba bengala mali yokubhadala iyabuza imbongi ukuthi pho baphe sipho bani? Baphe maculo bani?
Iyaqhubeka imbongi ibadumisa labo bakhokheli ithi bayisizwe bona ngokwabo. Lokhu kufakaza ukuthi labo bakhokheli bangaphezu koluntu lonke. Iqondisa le imbuzo komunye wakhokheli abalobelana phansi isivumelwano somanyano. Ithi uyiNkosi uhlobo lwakho. Imbongi ibuye imbuze imbuzo ethile: “Kambe singathi ufuze bani/Ungabe ufuze ukhokho na? Kungabe yisipho sakho. Iyambetha ngebizo lowo omunye wabakhokheli labo ithi: “Siyakuhlonipha Cde Mugabe”. Iphinde leyo Ndumiso emupha yona othi: “Siyabonga, Siyabonga”.
Iyaphambili imbongi isitshela okaMugabe ukuthi Siyabonga isizwe. Khonapho nje imbongi isingenisa omunye wabakhokheli balesi sivumelwano seUnity uJoshua Mqabuko Nyongolo Nkomo. Isebenzisa la amazwi imbongi:
Joshua Mqabuko Nyongolo Nkomo.
Siyajabula sona isizwe sakho kaNkomo. Imbongi ichaza ukujabula kwabantu sakuqolotsha kwamankonyane nxa esuthi. Lokhu kuvezwa yila amazwi: “Ayaqolotsha amankinyane/Yikubonga ngapha langapha”.
Sizaqhubeka ngayo linkondlo kunsuku ezizayo.
