uMthunywa
Indikimba – Ezomanyano
Imbongi nguF N Ndlovu
Isihloko senkondlo – Isivumelwano sokumanyana (22.12.87)
Lizananzelela bafundi ukuthi silokhu siphezu kwale inkondlo ekhuluma ngesivumelwano esikhulu sokumanyana esenzakala elizweni lakithi leZimbabwe. Lapha kwabambana amabandla amabili ayiwo alwela inkululeko yelizwe leli. Lawo mabandla sesiwaqambili ngaphambili sathi yiPF-ZAPU leZANU (PF). Ngensuku ezidlulileyo siphethe imbongi idumisa abakhokheli bala amabandla uJoshua Mqabuko Nkomo loRobert Gabriel Mugabe.
Imbongi ithi laba yibo ababesase lawo amazwi oxolo. Iyaphambili imbongi ithi lalabo abasasinakekela lesisizwe bona abaholwa yimimoya yamathonga (yamadlozi). Imimoya yabo JZ Moyo labo Tongogara.
Iyaphambili iqambe lamaqhawe wona afe esanakakela lesisizwe – lenkulungwane zona ezangcwatshwa yimpi yenkulululeko. Laba yilaba phela okuthiwa basala empini kusitsho ukuthi bafela khona. Ngalokho-ke imbongi ithi ifikelwa liqhono lokuqhatha izwe isuthiseka.
Iyaphambili imbongi ithi ngenxa yaleso sivumelwano elizweni kuvulwe isahluko esitsha. Ngenxa yalokho labo ababengahlaselanga ngenxa yokulwisana bona bengabantu banye obekusisa bequthile ubuthongo buzehla kuhle amaphupho lawo ageleze kuthi lanxa kulemibizo kumbe imihlangano bazeza ngobunengi baminyane. Kuthi lalowo okhulumayo embizweni lezo bazamuzwa bamnanze.
Iyaqhubeka imbongi ithi ngaso lesi sivumelwano sokumanyana izibongo zobuPF-ZAPU lobuZANU (PF) zizalulazeka.
Lapha imbongi ichaza ukuthi ukwehlukana kwabantu belandela amabandla ezombusazwe ehlukeneyo zizaphela.
Lokhu kungoba abantu sebemanyene, sebemoya munye. Lamhlanje imbongi ipha isibonelo samalokitshi asephiwe amabizo atshengise ukungezwani obekukhona yikho nje uthola amabizo anjengabo Nketa labo Nkulumane.
Ekwakheni la amalokitshi imbongi ithi akuqhatshwa ngini, akuqhatshwa muntu nje. Kodwa ngentando yamadlozi langalesi sivumelwano sokumanyana kwelabakuleli imbongi ithi sizakhangela emuva seboleke amazwi obuhlakani bendulo. Imbongi ithi ngehubo/ngengoma yinye sizathi,
“Akusilima sindlebende kwabo”. La ngamazwi okubuyisana sekuxolelwa labo abebethe baphuma endleleni eqondileyo babuyiswe labo.
Bazaqhatshwa lalabo abaphepheleyo/abasile empini. Imbongi ithi bazaqhatshwa laboThebula asebengamaqhawe asewile. Othebula yilaba ababengabalweli benkululeko. Leli libizo ababeliphiwe ngabantu kwezinye izigaba zelizwe.
Kungakabi lalesi sivumelwano somanyano bakhona imbongi ethi bebenike ilizwe isiphundu okutsho ukuthi bona bebehlamukile kodwa imbongi ibakhuthaza ukuthi kabalahle ingqondo yobuzimu/ubudlova balahle langezikhali.
Imbongi ikhuthaza ukuthi kazilahlwe zibuthelelwe kakutsha lezo zikhali zibe ngezokuvikela uZulu hatshi ukulwisa abantu. Ithi lemicabango yabo kayihlelwe kakutsha ngababusi kuthi ilizwe lithule zwi lihotshe umoya omnandi.
Sizayiphetha kunsuku ezizayo. Qaphelani bafundi ukuthi inkondlo le lingayiphambanisi leka Artwell T Masuku ethi Kulotshiwe phansi.
