uMthunywa
Indikimba – Ezempi
Imbongi nguDumisani J Tshuma
Isihloko senkondlo –Engakubonayo
Inkondlo esingayo lamuhla le elesihloko esiqanjwe ngaphezulu inde okwamagama.
Ngeqiniso ihle inike abafundi ukwesaba okokuthi lemihlolisweni nxa kulethuba lokuyiceza bangeze bakhetha ukuyihlaziya abafundi.
Abafundi babina kungabasinda ukukhumbula zonke izinto ezimunyethwe yile inkondlo. Lanxa kunjalo kulula ukuyenza kuhle linkondlo.
Njengezinye inkondlo ezinde lezimfitshane kumele lakuyo inkondlo bayifunde bayizwisise benelise ukuphendula imibuzo ephezu kwayo.
Zamani bafundi ukuthi liyifunde likhumbule konke engakho inkondlo njalo lenelise ukufinqa imicijo yayo.
Lingeze lakhumbula phose konke engakho inkondlo kodwa njengoba inde kangaka kunengi elingakuchasisa lithole imiklomelo engalenza liphumelele kuhle kakhulu.
Yona imayelana lani linkondlo? Isihloko senkondlo sithi, “Engakubonayo”.
Singakayi khatshana nje sihle sibe lombono ukuthi yabona okumangalisayo yikho nje ibabaza kokho eyakubonayo. Imbongi yabo lesisimanga ngesikhathi sempi.vIqala imbongi ithi yabona abantwana benhlabathi.
Abantwana benhlabathi labo ngabantwana belizwe leZiimbabwe ababambana ekulweleni ilizwe. Ilizwe leZimbabwe lalisezandleni zabamhlophe abayibo abahuquluza inotho.
Abamhlophe laba ababebusa ilizwe babethwalise abanikazi belizwe abantu abaNsundu gadalala.
Imbongi ithi yabona abantu beZimbabwe abantwana benhlabathi bebotshwe ngamaketani abathakathi. EsiNtwini abathakathi ngabantu abaloyayo ababulala abantu.
Ngikufanayo imbongi ifanisa abamhlophe labo ababecindezele abantu labathakathi. Lokhu kungoba abacindezeli labo abamhlophe babephethe abantu ngochuku.
Babethwalise nzima abntu abanikazi bomhlabathi, abantwana benhlabathi.
Kuthiwa zanxapha inyoka zesizwe. Lokhu kutsho ukuthi amadlozi abantu beZimbabwe azonda ebona lokhu okwakusenziwa ngabamhlophe phezu kwabantu abaNsundu.
Esezondile amadlozi abaNsundu athulula umoya wobudlozi zawugxumeka ezinhliziyweni zabantwana benhlabathi labo ababenziwe izichaka bengasizichaka.
Umoya lowo wahluma wakhaphazela uthelezelwa ligazi lesizwe.
Wahluma lowo moya wathela, wathela futhi.
Umoya lowo owathelwa ngamadlozi esizwe wakhaphazela nje kanti uyomula.
Wahelelwa wazithukulula. Abafokazi bona bawutshaya ingcekeza, indiva, bethi ngumoyandini ongasilutho nje.
Kanti batshonjalo nje zingcitshi zabo ezibhudayo.
Baphunyuka abantwana benhlabathi ezandleni ezilukhuni zabathakathi, abacindezeli.
Bakhala igazi ngenhliziyo kopha, kambe bezilonda ziphihlika.
Bakhala ogazo nje ngoba babuhlungu ngokucindezelwa nja;p besosiwa endengezini ezibomvu.
Imbongi igcizelela lokhu kuthwaliswa nzima ngokuthi, “Ye. Angithi bakhanzingwe bephila”.
Umuntu angaphekwa ephila na?
