uMthunywa
Wayne Ncube
ABALIMI sebexwayiswe ukuthi bagezise izilimo bengakazisi emkambo loba bengakazithengiseli abezitolo ngoba lokhu kulakho ukuphambanisa impilakahle yabathengi.
Kubikwa kulemitshana esetshenziswa ngabalimi ngesikhathi izilimo zabo zisemasimini elakho ukuphambanisa impilakahle yabathengi kungakho-ke kubalulekile ukuthi umlimi enqabele lokhu ngokugezisa izilimo zakhe kanye lezithelo okuzwayo engakazithengisi.
Lokhu kuvezwe ngenye ingcitshi yezilimo kanye lezifuyo kunkampani yeFarm and City Centre uMnumzana Ray Shava.
UMnu Shava ubikele intatheli yephephandaba likazulu ukuthi kuqakathekile ukugezisa ngonanzelelo izilimo lezithelo.
“Imikhuhlane ephathelene lokungageziswa kuhle kwezilimo lezithelo igoqela i-E-coli le Salmonella okungaphambanisa impilakahle kazulu,” kutsho uMnu Shava.
Uqhubekele phambili efundisa abalimi kanye lozulu ngendlela eqondileyo yokugezisa imibhida kanye lezithelo. “Indlela zokugezisa izilimo zehlukene, ama-apula lama- cucumber ajwayele ukufakwa i-wax ukuze kuhlale isikhathi eside kungabolanga.
I-wax le iyagulisa ngemva kwesikhathi.
“Ngakho abalimi kabahlalise izilimo zabo emanzini akhudumalayo okunye bengazi-sprayer nge-vinegar lokhu kwandise ukuncedisa kakhulu ngoba abanye bamane bazithele nje ngamanzi,” kutsho uMnu Shava.
Uphethe ngokuthi abalimi kumele bazinike isikhathi nxa begezisa imibhida yabo ngoba bengekela ukwenza lokhu abathengi bacina bengasathengi izilimo zabo.
