uMthunywa
Wayne Ncube
ABALIMI sebekhuthazwe ukuthi bagele izimvu zabo ngoba zilakho ukubamba imikhuhlane ngokuhlala zilengcekeza kanye lokungahlaliseki nxa zingasagelwanga.
Ingcitshi kwezokufuya uMnumzana Mkhumbuzi Siziba olilunga leZimbabwe Farmers Union uxwayise abalimi ukuthi ukugela izimvu kuqakathekile kakhulu ngoba kuzivikela kungxaki ezinengi njalo zingahlala zigeliwe umlimi laye angabalakho ukuba lenzuzo ethe xaxa lezimvu ezilempilakahle enhle.
Ekhuluma lentatheli yephephandaba likazulu uMnu Siziba uthe: “Ukugela izimvu kumele kuhlale kusengqondweni yomlimi njalo kumele kube yisenzo esejwayekileyo ngoba kuyavikela izimvu emikhuhlaneni njalo kwenza zihlale zihlanzekile.”
Imvu ingahlala isikhathi eside ingagelwanga kungaba lenkinga ezinengi umlimi angahlangana lazo ezigoqela ukungcola kwezimvu ngenzala kumbe ukungahlaliseki utshinda solubambe ameva njalo zilakho ukucaka ngoba sezisindwa lutshinda.
UMnu Siziba uphinde wagcizelela wathi: “Utshinda olunengi lwehlisa uhlonzi lwezimvu lokukhweza kumbe ukwehlisa ukutshisa komzimba wazo, okuyinto engekho nhle kumpilakahle yezimvu ngoba kwezinye izikhathi ziyatshiselwa kakhulu besezisifa,
“Umthambiso, ubulongwe kanye lezihlahla ziyabambela kutshinda lwezimvu. Lulakho njalo ukubiza impukane kanye lemikhaza leminye imikhuhlane etshiyeneyo okungabeka impilakahle yezimvu engozini.
“Izimvu ezilotshinda olunengi zincindezelwa kakhulu endleleni zazo njalo zisengozini enkulu kuzinyamazana ezizingelayo ezifana lamakhanka ngoba zisindwa lutshinda,” kutsho uMnu Siziba.
UMnu Siziba uthe izimvu zilakho ukubamba imikhuhlane efana le-urinary calculi le enterotoxemia.
“I-urinary calculi abalimi bengaqala ukuyibona kuzifuyo zabo ngokungahlaliseki lokungachithi kuhle, abalimi bengavikela lokhu ngokunika izimvu zabo i-ammonium chloride lokugabelana i- 2:1 i-calcium kusiya ku-phosphorus,
“I-enterotoxemia kumbe imikhuhlane yokutshisa kwezimvu yenzakala ngesikhathi izimvu zisidla umumbu omnengi, lokhu abalimi bangakubona ngezimvu zibhoda isigombolozi loba ukungathi ziswele ukuthi ziqonde ngaphi,” kuphetha uMnumzana Siziba.
