uMthunywa
Thokozile Mbedzi
ENYE inkampani eyenza inhlanyelo kuleli isikhuthaze abalimi kundawana zonke zelizwe ukuba bagebhe amagodi aqondileyo ngoba uga tshompo ulethela umlimi isivuno esihle.
Ekhuluma lentatheli kaMthunywa uMnumzana Brian Tatenda Watambwa kumbukiso weZimbabwe International Trade Fair uthe abalimi kabagebhe amagodi aqondileyo ngoba uga tshompo ulenzuzo kubalimi.
“Abalimi kabagebhe amagodi aqondileyo ngoba uga tshompo utholisa abalimi isivuno esihle kakhulu.
“Inengi labantu basuka bequmele indlela amagodi la agejwa ngayo ngakho ngithi abalimi kabalandele lindlela eye 75cm ×60cm njalo kube yi-30cm ukutshona lokhu kwenza umquba kunye lenhlabathi kuhlale kuhle amanzi agcineke kuhle nxa izulu selisina.
“Egodini eligejwe kuhle umlimi ulakho ukuhlanyela inhlamvu ezintathu zenhlanyelo. Uga tshompo muhle ngoba silwisana lokugugudeka komhlabathi.
“Zonke izinanakazana ezincedisa emhlabathini ukuthi wakheke ziyabe zilokhu zingaphanjaniswanga. Lamahlanga okwembosa izilimo lawo bayenelisa ukuwafaka ancedisa ukwehlisa ukhula,” kulandisa uMnu Watambwa.
“Abalimi kabakhululeke basibuze ngaso sonke isikhathi nxa kukhona abangakuzwisisiyo kundlela le. Bangaqumeli indlela le kodwa kabayenze ngendlela efaneleyo ngoba inhloso yethu ngeyokuthi izimuli zithole ukudla njalo lesiphala selizwe sithole ukudla okwaneleyo,” kuphetha uMnu Watambwa.
