uMthunywa
Wayne Ncube
INKAMPANI yeFarm and City Centre isikhuthaze abalimi ukuthi bafuye izintshe ngoba zilenzuzo emalini lakumpilakahle yabantu.
Ingcitshi kwezokufuywa kwezintshe enkampanini le, uMnumzana Ray Shava uthe abalimi bajayele ukufuya inkomo, imbuzi lenkukhu kukanti bangangena kubhizimusi yokufuya izintshe balakho ukuzitshayela imali enhle ngoba kungakabi labalimi abanengi abaphatheka kubhizimusi le.
“Izintshe zilenyama enhle njalo zifuyeka ngcono kulenkomo ngoba ukudla kwazo kuyathengeka. Kazidingi indawo enkulu okumangalisayo.
“Nxa ufuye izintshe ulakho ukwenza imali ngendlela ezehlukeneyo. Okokuqala abalimi bayakhetha ukuthi bafuna ukugcina wuphi umhlobo wezintshe phakathi kwezilentamo ezibomvu, lezilentamo eyisibhakabhaka loba ezimnyama ezeAfrica.
“Lapho-ke sungakhetha ukuthi uzabe uthengisa inyama, isikhumba loba amaqanda kumbe insiba,” kutsho ingcitshi le, uMnu Shava.
“Inyama yenyoni lezi iyaphathisa kumpilakahle yabantu. Kungaba ngamaqanda azo ayaphathisa.
“Nxa sekumele uzithengise umkambo wazo kawuhluphi ngitsho ngoba inyama yazo kayitholakali lula. Abalimi bayakhuthazwa ukuthi le yindlela enhle yokungena phakathi kwabosomabhizimusi umlimi enze imali enhle,” kutsho uMnu Shava.
Uqhubekele phambili uMnu Shava esithi okudingakalayo nje ekufuyeni izintshe yikuthi kumele zihlale zilokudla kanye lamanzi ngoba ziba lolaka zingaswela ukudla lamanzi.
“Abaqalisayo ukufuya izintshe bengakhetha emaqandeni angakacacadi, amatsiyane loba esezikhulile. Amaqanda angakacacadi loba amatsiyane intengo yokuwathenga ingcono kulokuthenga intshe esikhulile iloba izaphangisa ukuba lamaqanda,” kuphetha uMnu Shava.
