uMthunywa
Bongani Ndlovu
INHLANGANISO yeLivestock Production Development yakoBulawayo ikhuthaza abalimi ukuba bafuye inkomo zakuleli ngoba ziqinile njalo zilawo amandla okulwa lemikhuhlane lezibungwana.
Ekhuluma lentatheli kaMthunywa uMnumzana Cosmas Muzunde ubike ukuba kubalulekile ukuba abalimi bafuye inkomo zakuleli ngoba ziqinile njalo zijayele umumo womkhathi weZimbabwe okwenza zibe lamandla okuzivikela kumikhuhlane.
“Kubalulekile ukuba abalimi bafuye inkomo zakuleli hatshi ezangaphandle ngoba inkomo zakuleli ezifana leNguni, Tuli leMaShona ziyizifuyo eziqinileyo ngendalo ngakho zilawo amandla okulwa lemikhuhlane engabe ifuna ukuzihlasela.
“Inkomo lezi ziyenelisa njalo ukulwisa izibungu ezifana lemikhaza kanye lamawemusi esiswini,” kuchaza uMnu Muzunde.
Uqhubekele phambili esithi inkomo zakuleli zilakho ukuphila endaweni ezingela zulu kumbe ezingela madlelo amahle.
“Inkomo zakuleli ziqinile okweqiniso ngakho zilakho ukuthi zihlale endaweni engela zulu elinengi njalo ziyenelisa ukuthi zihlale amalanga zinganathanga amanzi kodwa kungazilimazi umzimba.
“Ziyenelisa futhi ukuhamba umango omude zisiyadinga ukudla nxa kungela madlelo amahle eduze,” kuchasisa uMnu Muzunde.
Uqhubeke wathi inkomo zakuleli zilakho ukumela isimo somkhathi saselizweni njalo azibi lobunzima nxa zizala.
“Inkomo zakuleli azihlutshwa ngumkhathi waselizweni ngoba kungasimfihlo ukuthi kuyatshisa ngakho uboya bazo buyazivumela ukuthi ziginqe lapho kutshisa njalo zivikeleke emqandweni nxa kuqanda, inkomo zakuleli kazithwali nzima nxa zizala ngakho abalimi kabalahlekelwa ngamathole ngesikhathi zizala,” kuphetha uMnu Muzunde.
