uMthunywa
Ethel Ncube
INHLANGANISO ebona ngezempilakahle yezifuyo, eyeVeternary Services isikhuthaze abalimi ukuthi bangene kubhizimusi yokufuya ingalukhuni ngoba zilemali.
UDokotela Marian Ndlovu obona ngezokufuywa kwenkukhu koBulawayo uthe balutshwana abalimi abafuye ingalukhuni kuleli kukanti zilakho ukunika abalimi inzuzo enhle.
Ekhuluma loMthunywa uDkt Ndlovu uthe ingalukhuni azidingi okunengi ukuthi umlimi aze azifuye.
“Ingalukhuni zithatha inyanga eziyisithupha ukuze zikhule zithengiswe. Abafuyi abanengi besaba ukuba zithatha isikhathi kodwa nxa usuzithengisa zilenzuzo enhle.
“Amatsiyane engalukhuni lawo ahlupha emancane ngoba afuna ukunakekelwa njalo kumele ube le-stress pack khonapho esanda kucacadwa uwanathise. Ngemva kwalokho sokumele nje uwanakekele inyanga eziyisithupha.
“Zingaba lenyanga ezinhlanu zilakho ukuqala ukubekela nxa sekunjalo ulakho ukwekela ezibekelayo zilalele zize zicacade kuthi ezinye uzithengise ngemali ephakathi kweUS$25 kusiya ku US$30 eyodwa,” kubika uDkt Ndlovu.
Uqhubekele phambili eveza ukuba ingalukhuni azilamthwalo omnengi.
“Engingakutsho kubafuyi ukuze ingalukhuni zabo zingafi yikuzipha ukudla okwaneleyo njalo lapho ezihlala khona ukhangele ukuba akulamatseketse njalo ubone ukuthi isilugu sihlala sihlanzekile. Lapho ozivalela khona kumele kwezinye insuku uzivulele zitshaywe ngumoya,” kuphetha uDkt Ndlovu.
