Thokozile Mbedzi
ABAFUYI bakhuthazwa ukuba bafuye imvundla yohlobo lwe-New Zealand ngoba ilenzuzo njalo kayilamsebenzi omkhulu ekuyifuyeni.
Ekhuluma eseZimbabwe International Trade Fair kunyanga edluleyo, uMnumzama Philani Nyoni ofuya imvundla eselokitshini leCowdray Park koBulawayo uthe ukufuya imvundla yohlobo lwe-New Zealand kulenzuzo enengi.
“Imvundla yohlobo lweNew Zealand white ilenzuzo ngakho abalimi kabathathele phezulu ukufuya imvundla le ngoba ilenzuzo engcono.
“Imvundla leyi ingagcinwa kuhle iba lesisindo esingedlula i5kg njalo umhlobo lo ukhula masinyane,” kutsho uMnu Nyoni.
“Uhlobo lweNew Zealand white lulakho ukugcinelwa inyama loba ukufuya.
“Umkambo wemvundla ukhona njalo abafuyi balalo ithuba lokuthengisa imvundla yabo ngoba abafuyi abakhona kabenelisi umkambo okhona.
“Kudingakala ukuba abafuyi basukumele phezulu bafuye imvundla le ngobunengi babo ngoba abakhona bengawenelisi umkambo oyidingayo.
“Ngikhuluma nje isilaha esikhona siseHarare kuphela balesifiso ukuthi bafake ezinye koBulawayo lakuzo zonke indawana zelizwe kodwa kunzima ngoba imvundla le kayikho,” kutsho uMnu Nyoni.
Uqhubekele phambili wathi ukufuya imvundla akulandleko ezinengi ngoba kayihlaselwa yimikhuhlane eminengi.
“Imvundla kayilayo imikhuhlane emangalisayo, okuqakathekileyo kuyo yikuyigcina endaweni ehlanzekileyo.
“Ama-cages amele avuleke ngaphansi ukuze ingcekeza iziphumele kuhle iyephansi ngoba ingcekeza le yiyo edala imikhuhlane.
“Okunye njalo okuqakathekileyo yikuyipha ukudla okuhlanzekileyo ngaso sonke isikhathi.”
Uphethe ngokukhuthaza abanye abalesifiso sokufuya imvundla ukuthi bangathandabuzi ngoba kayidingi ndawo enkulu ngoba lakhonapha edolobheni iyafuyeka.
“Mina imvundla ngiyifuya khonapha koBulawayo kangilahlupho lomkambo ukhona ngakho ngikhuthaza uzulu ukuba kabafuye imvundla.
“Ubuhle ngemvundla yikuthi loba ngubani angayifuya ngoba kungadingakali ukuba kusetshenzwe gadalala ukuze umuntu ayifuye,” kuphetha uMnu Nyoni.
