uMthunywa
Thokozile Mbedzi
ABALIMI kundawana zonke zelizwe bakhuthazwa ukuba bafuye umhlobo wembuzi zeKalahari ezibomvu ngoba ziyavuma kundawana zonke ezikuleli njalo ziyamelana lemikhathi etshiyeneyo.
Omunye umkhokheli wepulazini leMzilikazi Kalahari Reds uMnumzana Honest Ndlovu obesenkundleni yeZimbabwe International Trade Fair uthe umhlobo we-Kalahari uyavuma kuzo zonke indawana zelizwe njalo ziyamelana lemikhuhlane eminengi.
“Silapha eZITF ukuzobukisa lokwabelana lozulu ukuba kabafuye imbuzi zomhlobo weKalahari ngoba ziyavuma kundawana zonke zelizwe njalo ziyamelana lemikhuhlane.
“Saqala sifuya ezemakhaya zona lezi ezifuywa nguye wonke umuntu, ngokuya kwesikhathi silokho sifunda sacina sithola ulwazi lokuba umhlobo weKalahari ulezinto ezinengi eziphathisa umlimi ukuba athuthuke. Kungakho sathenga impongo eSouth Afrika sazozihlanganisa lezinsikazi zethu ngapha kwaphuma iF1 eyiyo i-breed yakuqala saqhubekela phambili saze saba le-crossbreed yesithathu yona eyi-F3 leyi iyabe isi-100 phesenti Kalahari Red,” kuchaza uMnu Ndlovu.
“Isiyi-F3 yonke indlela ekhangeleka ngayo iyabe isifanana lempongo yona eyiKalahari lamehlo acatshela ilanga konke kuyabe sokufanana. Thina sikhuthaza abalimi ukuba bafuye imbuzi lezi ngoba zilomehluko lalezo abalazo njalo umehluko ngowokuthi lezi ziyavuma kundawana zonke zelizwe njalo zinkulu.
“Umlimi uyathola inzuzo enkulu kakhulu ngoba lezi ziyakhula kakhulu lenyama yazo ilohlonzi. Imbuzi lezi nxa seziyi-breed uqobo lwazo luba kuF3 kusiya kubo F, intengo yazo ifika kuUS$800. Umhlobo we-Kalahari muhle ngoba umbala wazo uyazicatshisa kumakhanka, impisi lakokunye okungaba yingozi kuzo kukanti ezimhlophe kulula ukuthi zibonakale. Imbuzi lezi zilempondo, kazibi yingudula okuzincedisa ukuba zizivikele kumpisi kunye lamakhanka.
“Kungakho sifisa ukuba uzulu afuye umhlobo we-Kalahari njalo bazekele zizidlele phandle ukuze inyama yazo ibeyiyo inyama yembuzi zemakhaya esiyaziyo ngoba sikhuthaza ukuba abantu bathole inyama eyiyo eyemvelo.
“Imbuzi ezizeleyo yizo abangazipha ukudla kodwa kumele zizihambele zizidingele ukudla nxa umlimi elepulazi angatshintshanisa ama-paddock nje ukuthi zithole ukudla,” kuphetha uMnu Ndlovu.
