Fuyani ama-boer goats alemali

10 Dec, 2020 - 00:12 0 Views
Fuyani ama-boer goats alemali

uMthunywa

Joel Ndlovu
ABALIMI abafuya imbuzi bakhuthazwa ukuthi bafuye imbuzi zomhlobo wama-boer ngoba zilenyama elohlonzi.

Ekhuluma lentatheli kaMthunywa uMnumzana Sheunopa Dube oyingcitshi kwezokufuya lokulima esabelweni seMatabeleland North uthe umhlobo lo ulenyama enhle kakhulu.

“Wonke umlimi olesifiso sokungena kubhizimusi yokuthengisa inyama yembuzi kafuye umhlobo wama-boer.
Imbuzi lezi zibonakala ngombala wazo obomvu ojiyileyo. Zilendlebe ezinde kanye lempondo ezikhangele emuva.

“Umhlobo lo ungatholisa umlimi inzuzo ngoba zimbuzi ezinkulu. Enduna enkulu ingaba lesisindo esingaba yi-115kg kuthi ensikazi yona esikhulile ingaba lesisindo se-75kg,” kutsho uMnu Dube.

UMnu Dube uphinde wathi umhlobo lo awuhlaselwa yimikhuhlane eminengi njalo umbala wazo uzenza zenelise ukuphila lapho okulelanga elitshisa khona kakhulu.

“Imbuzi zomhlobo wama-boer ziyenelisa ukuzivikela emikhuhlaneni eminengi eyandise ukuhlasela imihlobo evela ngaphandle kwelizwe.

“Umbala wembuzi lezi uzenza zenelise ukumelana lelanga elitshisayo ikakhulu elakuleli ilizwe. Ziqinile njalo ziyenelisa ukuhamba umango omude zidinga amadlelo,” kungezelela uMnu Dube.

UMnu Dube uphinde wathi imbuzi lezi ziyanda ngesikhatshana ngoba ziyazala minyaka yonke.

“Imbuzi zomhlobo wama-boer ziyenelisa ukuzala kathathu ngeminyaka emibili kuphela ngakho ngesikhatshana nje umlimi ozifuyayo uyathola inzuzo.

“Amazinyane akhona azalwa eqinile esenelisa ukuzimunyela njalo ayakhula masinyane. Ngalesisizatho umlimi akala msebenzi omnengi wokunakekela imbuzi lezi,” kuchaza uMnu Dube.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds