uMthunywa
Nkosilathi Sibanda
NXA iBulawayo City ingadliwa kumdlalo wayo wangempelaviki leHarare City, kuzahle kube mgceke ukuthi isilahle ithawulo, yavuma ukuthi sekumele ibuyele ezikwakweni.
Lizamile ukuma iqembu likamanisipala wakoBulawayo kodwa indima isuke yawoma, kwehlula ukuthi ivune imiklomelo ebingasiza ukuthi layo ibalelwe kwezinkulu kumdlalo kanobhutshuzwayo wakuleli.
Kumdlalo leHarare City, akula enye indlela yokubaleka. Akucatsheki. Nxa iBulawayo City ilokhe izitshela ukuthi isasekhona, kumele ithole imiklomelo yonke, ikhulekele ukuthi iqembu leZPC Kariba linqotshwe yiHighlanders.
Abafana beKariba labo balwisa ukusila kuligi nanko balemiklomelo engu-35 bekunombolo yesi-14 kungalane. Amakhosi wona anamathele kunombolo yesi-15, ephethe imiklomelo engu-33. Ukutshiyana kwazo ngemiklomelo emibili yikho okuzathi mehlo mpo kumidlalo le.
Sekusele imidlalo emibili kuphela ukuthi kugqitshwe iligi yeCastle Lager Premier Soccer League, okutsho ukuba wonke amaqembu asalelwe yimiklomelo eyisithupha. Lezo eziphansi ziyazi ukubaluleka kwemidlalo eseleyo, ikakhulu iBulawayo City.
Intatheli yephephandaba likazulu ikhulume lomqeqetshi weBulawayo City, uFarai Tawachera obike ukuba ukhuthaze abadlali bakhe ukuthi umkhankaso weligi awukapheli ngakho kumele bazitshele ukuthi basesekhona kuligi.
Highlanders
“Okwakhathesi silwela ukuhlala kuPSL. Sifuna ukuba khona kuligi le ngomnyaka ozayo, ngakho imidlalo eseleyo ngeyokunqoba,” kutsho umqeqetshi lo, othe efika kuleli iqembu kunyanga ezimbalwa ezedluleyo kwaba lenguquko.
Kuzalindwa ukubonakala ukuthi uphethe cebo bani lokuthi Amakhosi agcine indawo yawo.
Ithimu le, izithembile ukuthi izasila kumhedla wokukhitshwa kuPSL lapho ekhangelelwe khona ukuthi inganqoba imidlalo elandelayo.
Usekhulume kanengi uTawachera ukuba benza konke okusemandleni abo ukuthi bangazitholi bephakathi kwengozi yokukhitshwa.
Njengoba iligi isemaphethelweni, nansi imidlalo ekhona kulimpelaviki:
Imidlalo
NgoLwesihlanu: Yadah v Chicken Inn (National Sports Stadium)
NgoMgqibelo: Caps United v Bulawayo Chiefs (National Sports Stadium), Craneborne Bullets v Tenax (Vengere), Bulawayo City v Harare City (Barbourfields), Whawha v Black Rhinos (Ascot)
NgeSonto: Highlanders v ZPC Kariba (Barbourfields) Manica Diamonds v Ngezi Platinum (Sakubva), Triangle v FC Platinum (Gibbo), Herentals v Dynamos (National Sports Stadium)
