uMthunywa
Nkosilathi Sibanda
KULANDELA ukuvula isitolo sempahla, iqembu lenguqu iBulawayo Chiefs selivule lesitolo esithengisa imithi esibizwa ngokuthi yiNinja Repair Garage.
“Sesivule esinye isitolo. Okwamanje sithengisa imithi yezempilakahle. Bonke abangezwa kuhle abadinga usizo bengaphathiswa,” kutsho uThulani Sibanda isikhulumi seqembu.
Amakhosi Amahle avula izitolo nje esethole udumo ebulenjini lapho aselandelwa linengi labantu abathanda amajesi abo abhalwe “Ebhoreni Akula John Cena”.
Iqembu leli laqala ngokuduma kuTwitter khathesi sebeguqula iqembu lisiba libhizimusi ngokuvula izitolo.
Iqembu leBulawayo Chiefs lithembise abalandeli balo isitolo sempahla esizavulwa maduzane emalokitshini akoBulawayo kulandela isicelo sokuthi iqembu lenze icebo kutholakale impahla zabalandeli beqembu.
USibanda uthe: “Abalandeli sizabasondeza eduzane lezitolo kodwa senza ngamandla ukuthi sitholakale lasebulenjini ukuze umlandeli wonke iloba engaphi enelise ukuthola eyakhe impahla yama ‘Ninja’ ayithandayo.
“Isitolo lesi sizakuba lezikipa zebhola, izikipa zokuzigqokela nje kuzokuthi impahla yonke ehlangane lezemidlalo izatholakala esitolo lesi,” kuchaza uSibanda.
