uMthunywa
KULIVIKI iphephandaba likazulu liliphathele umculi weSilobela oculela eMzansi ehlabela umculo obizwa ngokuthi yi-disco music.
Umhlabeleli lo ngosacathulayo kwezomculo ngakho udinga ukuxhaswa emsebenzini wakhe womculo. Umculi lo ucula ngobunono obukhulu njalo abalandeli bakhe bambalela kwezinkulu zezomculo. Nansi ingxoxo elandelayo phakathi kwalumhlabeleli uEphraim Mathanda (EM) lentatheli uEthel Ncube (EN).
EN: Jaha leZansi, tshela uzulu kabanzi ukuba wazalelwa ngaphi njalo nini?
EM: Mina ngazalelwa eSilobela ngomnyaka ka1980 ngafunda ezikolo ezibalisa iZenzele Primary leNtobe Secondary. Ngenxa yezandla ezaba mfitshane angizange ngenelise ukuqhubekela phambili ngemfundo.
EN: Waqala nini ukuhlabela?
EM: Ngaqala ukuhlabela ngomnyaka ka2014 kukanti ezomculo bengivele kuyinto engakhula ngiyithanda ngifisa ukuba lami ngelinye ilanga ngihlabele. Ukuhlabela ayisikho kudinga imali kodwa ngezingoma uyenelisa ukwakha lokukhuza abasakhulayo usebenzisa izingoma njalo ekuhlabeleni kuhlatshelwa kulenjongo hatshi ukujabulisa abantu kuphela, ulakho ukulaya lokukhuthaza ubuntu ebantwini.
EN: Sowake wathola isicoco ekuhlabeleni kwakho?
EM: Njengomculi osacathulayo angikaze ngithole isicoco kodwa lokhe ngisebenza gadalala kwezomculo ukuze lami ngithole isicoco ngelinye ilanga.
EN: Mangaki amadlalade osowaphekayo?
EM: Okwakhathesi ngilamadlalade amabili engawakhuphayo, ngikhuluma nje ngilelinye eliphekwayo khathesi elizaphuma maduzane nje uzulu alithole. Amadlalade ami abizwa ngokuthi Gwizi umful’ omkhulu kanye lelithi Bravo.
EN: Ukwenelisa njani ukuphatheka kwezomculo njengoba isikhathi esinengi usichitha emsebenzini?
EM: Emsebenzini ngihamba amalanga amahlanu kuphela, ngempelaviki ngiyabe ngisenza okomculo njalo ngipheka lamadlalade ngalesosikhathi.
EN: Mazwi bani enkuthazo ongawatshiyela abaculi abasacathulayo?
EM: Ngikhuthaza abahlabeleli ukuba kababe lobuntu njalo baziphathe kuhle ekuculeni. Okunye ukubekezela kuyinto enhle kakhulu, loba kunzima kangakanani koze kulunge. Ngibuye ngikhuthaze abahlabeleli futhi ukuthi asihlabeleni ngenhliziyo zethu zonke sijabulise umhlaba wonke njalo sakhe lesizwe sakithi ngomculo.
