uMthunywa
NGEZIMNANDI zodwa ezilethwa liphephandaba likazulu kusa kwamalanga nanko phela kule iviki lize lengadlangadla yejaha elimajaha mabili umsakazi osezakhele ibizo ngaphandle kwelizwe laseZimbabwe.
Nxa ufuna ukwazi ukuthi kukhulunywa ngobani nansi ingxoxo ekhwabithekayo phakathi kukaPromise Sibanda (PS) lentatheli yephephandaba likazulu uArnold Ndlovu (AN).
AN: Ake usithi fahlafahla utshele uzulu ukuthi ungubani langembali yakho lomsebenzi owenzayo njalo wagqugquzelwa yini ukwenza umsebenzi lo?
PS: Ibizo lokuzalwa nginguPromise Sibanda, ngileminyaka yokuzalwa engu-29. Ngivela eGombalume eTsholotsho kodwa ngaziwa kakhulu ngelithi DJ MaPressa. NginguDJ, umsakazi, lomqoqi wemicimbi etshiyeneyo. Okwabangela ukuthi ngikhethe imisebenzi le yikuthi ngakhula ngithanda imisebenzi yabasakazi kanye lothando lomculo kwangigqugquzela ukuthi ngicine ngikhetha umsebenzi lo.
Umsebenzi lo ngiwuqale ngomnyaka ka2010 lapho ebengitshayela abantu ingoma endaweni ezehlukeneyo zokuzithokozisa kwasokusithi ngomnyaka ka2013 ngazithola sengingena ekusakazeni kuwayilesi kuze kube lamuhla.
AN: Njengoba nje ukhanya usuleminyaka usenza lumsebenzi, bunzima bani osuhlangane labo emsebenzini wakho?
PS: Mina emsebenzini engiwenzayo ubunzima engihlangana labo ngobusekhaya ngoba singatholi isikhathi esinengi ukuthi ingoma zethu zitshaywe, kube futhi lodubo lokuthi imisakazo eZimbabwe milutshwana okugcina kusincindezela njengabahlabeleli.
AN: Abantu bathini ngomsebenzi wakho, bayawuthakazelela yini?
PS: Umsebenzi wami bayawuthanda kakhulu abantu ngoba sengileminyaka eminengi ngisenza umsebenzi lo.
Sengize ngakhipha amadlalade amabili abizwa Okumdala lokhu kanye lelithi Isikhwama segintsha njalo lonyaka ngisasebenza kwelinye idlalade elizakhokhelwa yingoma ethi Like that.
AN: Njengoba uke wathi uyasebenza lokuqoqa imicimbi simingaki imicimbi osuyenzile labahlabeleli beZimbabwe?
PS: Umsebenzi muhle libambisene labantu njalo mina ngokuqoqa imicimbi eyehlukeneyo ngisebenzela ukukhulisa umculo weZimbabwe, imicimbi esengiyiqoqile igoqela iZidafo Gospel Festival kanye lomkhulu engiwenza minyaka yonke obizwa Injiva Home Coming owenzelwa eDingimuzi Stadium ePlumtree.
