uMthunywa
YiNtatheli kaMthunywa
IBULAWAYO City izabe ikhona kuligi yeCastle Lager ngesizini ezayo ngoba izathenga indawo kamakhelwane iBulawayo Chiefs.
Abafakazi abaqotho abaseduzane lamaqembu womabili babika ngokugcweleyo ukuthi izikhulu zamaqembu la ziphakathi kokukhulumisana ngemali efunakalayo.
IBulawayo City iliqembu lekhansili njalo kuyaziwa ukuthi iqhuba inhlelo zayo ngokusebenzisa ingxenye thile yemali ephuma kuzakhamizi.
Omunye wabafakazi abathembekileyo laba, uSinikiwe Khoza osebenza ehofisini yezemali ekhansilini uthe liqiniso elaziwayo ukuthi iBulawayo City izathenga iBulawayo Chiefs.
“Lokho akulamuntu ongakwala loba nje kuyimfihlo enzima ekhansilini. Sekwenziwe imihlangano mayelana lokuthi iBulawayo City izathenga iBulawayo Chiefs,” kutsho lumfakazi.
Omunye wabafakazi abayethule udaba uthe okwamanje iziphathamandla zamaqembu la kunzima ukuthi ziphumele egcekeni.
“Ukuthengwa kwe-franchise yeBulawayo Chiefs kusegudwini. Iqembu elihamba phambili yiBulawayo City.
Abaphathi beBulawayo Chiefs babika ukuba basebunzimeni bemali, ngakho angeke baqhubekele phambili belisekela.
“Sekwenziwe imihlangano ngasese, kukhulunywa ngaloludaba. Impumela ingabe iseduzane,” kutsho umfakazi lo.
Iphephandaba likazulu lizame ukuxhumana leziphathamandla zeBulawayo City uJerry Sibanda loZenzo Moyo kodwa kwehlule ngoba bebengadobhi ucingo.
IChiefs isikwale kanengi ukuthi iyathengiswa.
UMthunywa uphethe udletshana lokuba omunye wabanikazi beChiefs wabika ukuthi kasoze enelise ukuqhubeka ehlawulela iqembu. Kubikwa wanxusa iBulawayo City ukuthi ithathe indawo kuPSL.
Iqembu leli liqeda isizini yalonyaka lisadalala nanko belisehluleka ukubhadala abadlali.
Langomnyaka odluleyo iChiefs yaphosa yathengiswa kusizini yayo yakuqala ingena kuligi ephakemeyo.
