Uncategorized

Boph’ ijambo Brito

30 Jun, 2022 - 00:06 0 Views
Boph’ ijambo Brito Balmatar Brito

uMthunywa

Nkosilathi Sibanda
KUMDLALO wakuqala, echinsa ukungena enkundleni yeBarbourfields, umqeqetshi weHighlanders FC uBalmatar Brito uqede umsebenzi wakhe ethabe emanzi te.

Uzakwenelisa na ukuphinda lokhu kumidlalo elandelayo ukuthi akhuze abadlali benze okufanayo kuyo yonke imidlalo? Abalandeli balindile.

IHighlanders idlala leqembu leNgezi Platinum ngeSonto kuligi yeCastle Lager enkundleni yeBaobab, kumdlalo ozabeka umqeqetshi weBosso emehlweni abantu, befuna ukubona ukuthi icebo abuye lalo liyasebenza yini.

Kumdlalo wakhe wakuqala, uBrito uwabambile amasotsha eBlack Rhinos ngokunqoba nge 3-2.

Balmatar Brito

Kuyavela kodwa ukuthi nxa iBosso isemangweni, kubanzima ukuthi inqobe. Ibiphuma ingutshiki lobhanqa kumbe idliwe. Lasegumeni layo eBarbourfields, iHighlanders ibixega amadolo nxa idibene leNgezi Platinum.

Lokhu kuletha ingqobe kumqeqetshi omutsha lo, ozabe echinsa ukukhuza ekaMatshobana engaphandle kweguma layo.

Zombili zivula inkundla kumdlalo wesibili, kusigaba sesibili seligi yeCastle Lager.

Abalandeli beHighlanders abakhulume loMthunywa ngoLwesithathu emini bathe abasoke bawukhuthe lumdlalo. Isizatho salokhu, yikubakhona komqeqetshi omutsha.

Uzenelisa na uBrito?
Lo ngumbuzo abalawo abalandeli nxa bekhumbula ukuthi akula ukudlula phezulu kwamasotsha.

Iphephandaba likazulu lihlolisise imidlalo yamaqembu womabili, kwavela ukuthi zaphuma zingutshiki lobhanqa mhlaka 28 Lwezi 2021.

Kulumdlalo kwakuqeqetsha uMandla “Lulu” Mpofu. IBosso yamelana leNgezi Platinum kwaba yi 1-1 mhlaka 13 Lwezi ngesizini ka-2019, andubana kuvalwe imidlalo ngenxa yeCovid-19. Imiklomelo phakathi kwamaqembu la ikubeka mgceke ukuthi iNgezi Platinum ihamba phambili ngokuhlohla. NgeSonto, ingqobe ekuBrito ngeyokutshintsha impumela le.

uMandla “Lulu” Mpofu

Umlandeli weBosso olodumo kuzitanda zeSoweto eBarbourfields, uPhilisani “SamaNdlo” Ndlovu ukhulume lentatheli kaMthunywa wathi umlandu ukuBrito.

“Sizagcwala sithi phamu ngeSonto. Thina siyi-Team Away. Silande ukuyabona ukuthi umqeqetshi lo uzasiphathelani futhi,” kutsho uNdlovu.

“Singazi kumbe uzenelisa ukuqhuba kakuhle ngendlela esiyibone eBarbourfields sidlala leBlack Rhinos? Okutshayisa ngovalo yikuthi lakhathesi, lokhe saxotsha uMandla, akukathengwa ngitsho lomdlali.”

Inkulumo kaNdlovu le ivela ekuthini ngesikhathi abaphathi beHighlanders bexotsha uMpofu, kwakulesikhalazo sokuthi iqembu alihlohli. Pho uBrito uzenzani njengoba engakathengi umgadli.

UMthunywa uzwe ngabafakazi abaqotho ukuthi uBrito ujonge ukuthenga uVincent Moyo, imvimbi esabambe kuBulawayo City. Omunye osemehlweni alumqeqetshi kubikwa nguMelikhaya Ncube odlala esiswini kuBulawayo City njalo.

Melikhaya Ncube

Ngokudingisisa kwephephandaba likazulu ngoLwesibili, mhla iBosso ilolonga kuliviki, uBrito uthwele nzima ukuthola umgadli ongahlohla.
Inhlanhla kaBrito ngeSonto ihlezi kuLynoth Chikuhwa, uStanley Ngala loNqobizitha Masuku. Ngesikhathi kudingwa imvumo yokukhuluma loBrito, izikhulu zeHighlanders zazise ukuba umqeqetshi kakanikezwa amandla okutsho umbono.

Kukhangelelwe ukuthi uBrito ahlangane lentatheli ngoLwesine (lamuhla). Umqeqetshi weNgezi Platinum uBenjani Mwaruwari, kungxoxo abelayo loMthunywa uthe uwulindele ngabomvu umdlalo.

“Siyazi ukuthi iHighlanders liqembu elikhulu kodwa silungiselele.”

Imidlalo yeviki lesi-19 kuligi yeCastle Lager:

NgoMgqibelo:

ZPC Kariba vs Yadah (Nyamhunga, 1pm),

Black Rhinos vs Herentals (Vengere),

Harare City vs Caps United (National Sports Stadium),

Chicken Inn vs FC Platinum (Luveve Stadium)

NgeSonto:

Ngezi Platinum Stars vs Highlanders (Baobab),

Dynamos vs Triangle United (National Sports Stadium),

Bulawayo Chiefs vs Cranborne Bullets (Luveve),

Manica Diamonds vs Bulawayo City (Sakubva),

Whawha vs Tenax CS FC (Ascot)

Share This:

Sponsored Links