YiNtatheli kaMthunywa
UKUHAMBA kukaBruce Kangwa esiyadlalela iqembu leAzam ezweni leTanzania sekukhuthaze labanye abadlali bakuleli ukuthi balubhekise khonale.
Iligi ephakemeyo eTanzania ibizwa ngokuthi yiVodacom Premier League. Iligi le kubikwa izimisele ukuthi ibhadale abadlali bakuleli imali enengi.
Azakhala amaqembu amanengi ngomnyaka ozayo eselahlekelwe zingcitshi zabadlali bawo ngoba kubikwa abacuphi labaqondisi babadlali bebhola likanobhutshuzwayo sebethelekile.
Abanye abadlali abatshibilika loBruce Kangwa babalisa uThabani Kamusoko otshibilikela kuqembu okuthiwa yiYoung Africans Sports Club, elidume ngokuthi yiYanga, uMethod Mwanjali loFrancesco Zikumbawire.
Imbiko ephuma esigodlweni eHarare ifinyelele iphephendaba likazulu isithi abacuphi babadlali sebefikile njalo balande abadlali abakuHighlanders, iFC Platinum, iCaps United, iChicken Inn leDynamos.
Ebulenjini bamaphephendaba akweleTanzania kulodaba oluthi ingcitshi yomdlali walisizini kuligi yeCastle Lager uHardlife Zvirekwi ubalelwa kulabo abazalubhekisa phandle kwelizwe ngo2017.
Ekhuluma loMthunywa ngemuva kokunikezwa kwakhe isicoco seCastle Lager, uZvirekwi uthe kungaba lithuba elihle lokuthi aphume elizweni kodwa usafuna ukwenza okunengi leqembu leCaps United.
“Angikezwa lutho ngokuphuma phandle kwelizwe. Labanikazi beqembu abazi lutho ngalokhu. Nxa kuliqiniso, kutsho ukuthi yikuvuleka kwamathamsanqa empilweni yami njengomdlali,” kutsho umdlali lo.