uMthunywa
Nkosilathi Sibanda
ABADLALI abathathu beqembu leHwange FC bakhuleke bengaqedi, bencenga ukuthi bengabulawa ngesikhathi bebanjwa inkunzi betshiywa benqunu.
Isehlakalo lesi senzakale emgwaqweni osuka koBulawayo uqonde eFolosi. Kuzwakale ukuba uKelly Shiyandindi, Brighton Makopa loJames Chivasa, behlelwe ngumnyama lo ngesikhathi becele ukugada enye imota yohlobo lwe-Toyota Wish, besiya eHwange.
Kubikwa abadlali laba bebegqoke izikipa zeqembu njalo babanjwe inkunzi ngumtshayeli encedisana lamanye amadoda abawafice emoteni. Umbuzo okhona ngesehlakalo sabo yikuthi kungani bengazange behambe leqembu mhla lidlala lisiya eHwange ngoMvulo.
IChipangano ibidlala leqembu leCaps United ngeSonto eHarare. Abafakazi abaqotho babikele intatheli ukuba bekungamelanga abadlali laba basale koBulawayo. Kuthiwa okwakhathesi indaba le isixabanise inkokheli zeqembu labaphathi beqembu, inkampani yeHwange Colliery.
“Ngomthetho wethimu, abadlali kumele bafike beliqembu eHwange. Akuvunyelwa ukuthi lo lalo asale lapho afuna khona,” kutsho umfakazi lo osebenzela iqembu, othande ukungaqanjwa ngebizo.
“Ukhona ongalahlekelwa ngumsebenzi kolokhu. Khathesi nje incingo zikhala kokuphela zivela eHarare ngoba abaphathi beqembu bacunuke kabi.”
Udaba lolu lusabalale ngoLwesithathu ekuseni enkundleni yokuxhumana iWhatsApp, lapho abantu abaduduze abadlali laba, bebacebisa njalo ukuthi bengakuphindi ukugada izimota zabantu.
Kusenjalo, umaneja obona ngobudlwelwano lokuthengiselana eHwange Colliery, uBeauty Mutombe uthe baluzwile udaba.
“Sithole udaba ngokubanjwa inkunzi kwabadlali bethu. Kodwa, kasikatholi ngokugcweleyo ukuthi kuhambe njani,” kutsho uMutombe ekhuluma lentatheli yephephandaba leChronicle ngoLwesithathu ekuseni.
